АҚШ Туркиядаги дипломатик вакилларини эвакуация қилади

Туркиянинг Адана шаҳридаги АҚШ Бош консуллиги ходимлари ва уларнинг оилалари хавфсизлик сабабли мамлакатдан эвакуация қилинади. Бу ҳақда бугун, 9 март куни АҚШ Давлат департаменти баёнот берди.

Қайд этилишича, мамлакатда ортиб бораётган Эрон ҳужумлар сабабли америкалик ходимларга ушбу ҳудудда саёҳат чекловлари жорий қилинган. Хусусан, жануби-шарқий Туркиядаги Адана, Адияман, Батман, Бингўл, Битлис, Диёрбакир, Элазиғ, Газиантеп, Ҳаккари, Ҳатай, Ичел, Килис, Қаҳрамонмараш, Малатя, Мардин, Муш, Усмония, Сиирт, Шонлиурфа, Ширнак, Тунжели ва Ван шаҳарларида анти-АҚШ ва анти-Исроил кайфият кучайгани боис саёҳат қилмаслик тавсия этилган.

Департамент, шунингдек, жануби-шарқий Туркияда бўлган америкаликларни дарҳол тарк этишга чақирган. Адана Бош консуллиги барча консуллик хизматларини вақтинча тўхтатгани сабабли ёрдамга муҳтож америкаликлар Анқарадаги АҚШ элчихонаси ёки Истанбулдаги Бош консулликка мурожаат қилиши кераклиги айтилган. 

Эслати ўтамиз, бугун, 9 март куни Эрон томонидан отилиб, Туркия ҳаво ҳудудига кирган баллистик ракета иккинчи бор уриб туширилганди.