АҚШ Тинч океанида яна бир кемани йўқ қилди. Қурбонлар бор

АҚШ наркотик савдоси билан боғлиқ деб тахмин қилинган кемага зарба берди ва оқибатда икки киши ҳалок бўлди. Бу ҳақда АҚШ Жанубий қўмондонлиги хабар берди.

АҚШ армиясининг қўмондони генерал Френсис Донован буйруғига биноан “Жанубий найза” номли тезкор гуруҳ Тинч океанида наркотик савдоси билан шуғулланувчиларга тегишли деб гумон қилинган кемага зарба берган. Оқибатда икки киши ҳалок бўлган. Америка томонидан ҳеч ким жароҳатланмаган. 

“Разведка маълумотлари кеманинг Тинч океанининг шарқий қисмидаги машҳур наркотик контрабандаси йўналишлари бўйлаб ҳаракатланганини ва наркотик савдоси операцияларида иштирок этганини тасдиқлади”, дейилади хабарда. 

Бундан аввалги сафар АҚШ ҳарбийлари январь ойининг охирида Пентагон раҳбари Пит Хегсет кўрсатмасига биноан Тинч океанида наркотик савдоси билан боғлиқ деб тахмин қилинган кемага зарба берилганини маълум қилган эди. Ўшанда ҳам икки киши ҳалок бўлган.

2025 йил декабрь ойининг охирида АҚШ томонидан эҳтимолий наркотик ташувчи кемага берилган зарба оқибатида бир киши ҳалок бўлган.

Ўтган йилнинг август ойининг бошида АҚШ Президенти Дональд Трамп Америка ҳарбийларига, аввало Венесуэла наркокартелларига қарши куч ишлатишга рухсат берган эди. Бу АҚШ билан Венесуэла, шунингдек Колумбия ўртасидаги муносабатларнинг кескинлашувига олиб келган.

Кейинчалик, 3 январь куни АҚШ махсус бўлинмалари Каракас шаҳрида Николас Мадурони қўлга олди. У, жумладан, наркотик савдоси билан боғлиқ айбловлар асосида суд қилинади.