АҚШ Россия билан авиақатновларни тиклашдан бош тортди

Америка Қўшма Штатлари Россиянинг тўғридан тўғри авиақатновларни тиклаш ҳақидаги таклифини рад этди. АҚШ ушбу масалани муҳокама қилишдан олдин Украинадаги урушда сулҳга эришиш лозим, деган позицияни билдирган. Бу ҳақда бугун, 17 апрель куни Россия Президентининг ёрдамчиси Юрий Ушаков “Россия 1” телеканалига берган интервьюсида маълум қилди.  

“Америкаликлар ҳозирча Украинадаги йўналишда бирор силжиш бўлиши керак, деган фикрда. Шундагина авиақатновлар ҳақида гапириш мумкин бўлади. Менимча, бу мантиқан ҳал этилиши мумкин бўлган масала эди”, дейди Ушаков.

У, шунингдек, Россия Президенти Владимир Путин ва АҚШ Президенти Дональд Трамп ўртасидаги телефон суҳбати масаласида ҳам ҳозирча бирор ижобий ўзгариш йўқлигини қўшимча қилган.

“Бу масала ҳақида сўз бормоқда, лекин ҳали ҳеч қандай келишувга эришилгани йўқ”, деди у.

Маълумот учун, Украинадаги уруш бошланганидан сўнг АҚШ ва Европа Иттифоқи Россия авиакомпаниялари учун ўз ҳаво ҳудудларини ёпган эди. Бунга жавобан Москва ҳам 36 та давлат авиакомпанияларига нисбатан худди шундай тақиқ жорий қилган ва парвозлар учун “Росавиация” ёки Ташқи ишлар вазирлигининг махсус рухсатини талаб қилмоқда.

Россия илк бор АҚШга авиақатновларни тиклашни жорий йилнинг 27 февраль куни Истанбулда ўтган музокараларда таклиф қилган. Ушбу масала апрель ойининг бошида ҳам муҳокама этилган. Ўшанда Россия тўғридан тўғри инвестициялар жамғармаси раҳбари Кирилл Дмитриев Вашингтонга сафар қилган эди.

“Тўғридан тўғри авиақатновларни тиклаш бўйича фаол иш олиб борилмоқда”, деган эди у музокаралардан сўнг.

27 март куни Россиянинг АҚШдаги янги элчиси Александр Дарчиев ушбу масалани ўзининг устувор йўналишларидан бири деб эълон қилиб, авиақатновларни тиклаш ва виза тартибларини соддалаштириш устида ишлаётганини айтган. У амалий ишлар бошлангани ва бу йўналишда “яхши суръат” мавжудлигини таъкидлаган.

Бироқ Дмитриевнинг ташрифидан кўп ўтмай АҚШ Давлат департаменти раҳбари Марко Рубио бу борада ҳеч қандай режалар ҳақида хабари йўқлигини айтиб чиқди.

“Россия ва АҚШ ўртасида тўғридан тўғри рейсларга қайтиш ҳақида ҳеч нарса эшитмадим. Қолаверса, санкциялар остидаги руслар бунчалик кўп бўлганида, у рейсларда ким учади ўзи?” дея ҳазиллашган у.