АҚШ осмонида улкан метеорит портлади (видео)

Кеча, 17 март куни тонгда АҚШнинг Оҳайо штати осмонида йирик метеорит портлади. Портлаш қуввати тротил эквивалентида 250 тоннани ташкил этган. Бу ҳақда АҚШ Миллий аэронавтика ва коинотни тадқиқ қилиш бошқармаси (NASA) вакилларига таяниб, NBC News хабар берди.

“У кўплаб парчаларга бўлиниб кетди ва тротил эквивалентида тахминан 250 тонна энергия ажратиб чиқарди”, дейди телеканалга NASA метеоритлар бўйича бўлинмаси раҳбари Билл Кук.

NASA маълумотларига кўра, метеорит парчалари ерга сочилган. Телеканалга кўра, метеоритнинг вазни 7 тонна, диаметри эса тахминан 1,8 метрни ташкил этган. У соатига қарийб 72,4 минг км тезликка эришган ва парвоз пайтида парчаланиб кетган, бу эса кучли портлашга сабаб бўлган.

Метеоритнинг учиб ўтишини Оҳайо, Висконсин ва Мэриленд штатлари аҳолиси кузатган. Мутахассисларнинг таъкидлашича, метеорит парвоз пайтида парчаланиб кетишдан олдин атмосферанинг юқори қатламлари бўйлаб тахминан 55 км масофани босиб ўтган.

Эслатиб ўтамиз, аввалроқ Германиянинг ғарбий ҳудудида метеорит қулаганди. Унинг парчалари қатор тураржой биноларига зарар етказган.