АҚШ “Олтин гумбаз”ининг 4 та ҳимоя қатлами бўлади

Қўшма Штатларда ишлаб чиқилаётган “Олтин гумбаз” ракетага қарши мудофаа тизими тўртта ҳимоя қатламига эга бўлади. Бу ҳақда кеча, 12 август куни АҚШ ҳукуматининг “Go Fast, Think Big!” номли ҳужжатига таяниб, “Reuters” хабар берди.

Ҳужжатга кўра, “Олтин гумбаз” тизими ракеталарни аниқлаш, огоҳлантириш ва кузатиш учун мўлжалланган космик қатлам, шунингдек, ракетага қарши мудофаа ва ракеталарни ушлаб туриш тизимлари, радар массивлари ва эҳтимол, лазерларни ўз ичига олган учта ер қатламидан иборат бўлади.

АҚШ Президенти Дональд Трамп томонидан Исроил “Темир гумбаз”ининг аналоги сифатида ишлаб чиқилган “Олтин гумбаз” лойиҳасининг қиймати 175 миллиард долларга баҳоланмоқда. Тизим 2028 йилда ишга туширилиши керак, деб тахмин қилинмоқда.

Оқ уй раҳбари АҚШга ракеталар билан таҳдид солиши мумкин бўлган аниқ бир давлат номини айтмади. Шу билан бирга, у “Олтин гумбаз” ракеталарни “дунёнинг бошқа қисмидан ёки коинотдан” учирилган тақдирда ҳам тутиб олиши мумкинлигини айтган. Республикачи Трамп, шунингдек, “Президент Рейган 40 йил аввал бошлаган ишни тугатишга” ваъда берган. 1983 йилда республикачи президент Рональд Рейган Қўшма Штатларда, шу жумладан космосда янги ракетага қарши мудофаа тизимини яратиш учун Стратегик мудофаа ташаббусини (SDI) эълон қилди. Ўшанда Рейган “даҳшатли Совет ракета таҳдидига қарши туриш” зарурлигини айтган эди.