АҚШ Мудофаа вазири қабр олдида кулгани учун аскардан танбеҳ эшитди

АҚШ Мудофаа вазири Пит Хегсет ва унинг жамоаси Арлингтон миллий қабристонидаги Номаълум аскар қабри олдида суратга тушаётганида кулгани учун уларни қўриқлаётган аскардан танбеҳ эшитди. Ҳарбий хизматчи улардан бу жойда сукунат ва ҳурмат сақлашни талаб қилди. Бу ҳақда “Associated Press“ хабар берди.

Қайд этилишича, воқеа кеча, 11 ноябрь куни Фахрийлар кунига бағишланган маросимдан сўнг юз берган. Хегсет қабр олдидаги зинапояларда рафиқаси Женнифер Рауше ва ўз жамоаси аъзолари билан суратга тушган. Гуруҳ суратга олишни якунлаётганида баланд кулги эшитилган.

Шундан сўнг қабрни қўриқлаётган аскар уларга қарата:

“Барча ташриф буюрувчилар доимо сукунат ва ҳурмат муҳитини сақлаши шарт”, деб мурожаат қилган.

Пентагон матбуот котиби Шон Парнелл аскарнинг ҳаракатини тўғри деб баҳолаган. Унинг айтишича, ҳарбий хизматчи барчага хотира маросимида одоб сақлаш кераклигини ҳурмат билан эслатган. Шунингдек, у Хегсет ва Мудофаа вазирлиги ҳарбийларнинг фидойилигини доимо қадрлашини таъкидлаган.

Маълумот учун, Номаълум аскар қабри АҚШдаги энг муқаддас ҳарбий ёдгорликлардан бири ҳисобланади. Бу ерда Биринчи ва Иккинчи жаҳон урушлари, шунингдек, Корея урушида ҳалок бўлган, шахси аниқланмаган аскарлар дафн этилган. Қабр 1948 йилдан буён кечаю кундуз қўриқланади.

Эътиборлиси, бу воқеа Хегсет Конгрессдаги импичмент ташаббусидан аранг қутулганидан бир кун ўтиб юз берган. Мазкур ташаббусга республикачи конгрессмен Томас Масси бошчилик қилган, уни демократлар ҳам қўллаб-қувватлаган. Жорий йилнинг 10 ноябрь куни бўлиб ўтган овоз беришда Хегсетга қарши ташаббус муваффақиятсизликка учраган.

Арлингтондаги воқеадан кейин демократик конгрессмен Гвен Мур ҳам вазирни танқид қилган. Унинг фикрича, Хегсетнинг хатти-ҳаракатлари ҳарбий хизматчиларга ва Номаълум аскар қабри муқаддаслигига ҳурматсизликни кўрсатган.

Эслатиб ўтамиз, аввалроқ АҚШ Президенти Дональд Трамп Эрон билан уруш фонида ўқ-дорилар танқислиги сабабли Пентагон раҳбари Пит Хегсетдан тушунтириш беришни талаб қилганди.