АҚШ-Мексика чегарасида ноқонуний мигрантлар сони ошди – ОАВ

АҚШ Президенти Дональд Трампнинг сиёсатига қарамай Америка-Мексика чегарасида мигрантларнинг ноқонуний равишда чегарани кесиб ўтишга уринишлари сезиларли даражада кўпайгани қайд этилди. Бу ҳақда ўз манбаларига таяниб, “The New York Post” нашри хабар берди.

“Бу ойда чегарачилар 7200 дан ортиқ ноқонуний ўтиш ҳолатларини қайд этди, бу эса июль ойида қайд этилган 4600 мигрантга нисбатан 57 фоиз кўп. Ўша пайтда бу кўрсаткич тарихда рекорд даражада паст бўлган эди”, дейилади нашр хабарида.

Чегара патрули ходимлари ҳам нашрга сўнгги пайтларда тажовузкор ва жиноят содир этишга мойил ноқонуний мигрантлар сони кўпайганини билдирган.

Қайд этиш жоиз, жорий йилнинг январида инаугурация куни Трамп ноқонуний мигрантларнинг АҚШ ҳудудига кириб келишини дарҳол тўхтатишга ва миллионлаб мигрантларни депортация қилиш жараёнини бошлашга ваъда берган эди. Шунингдек, у Қўшма Штатларнинг жанубий чегарасидаги вазият муносабати билан мамлакат бўйлаб фавқулодда ҳолат режимини жорий этганди.

Эслатиб ўтамиз, жорий йилнинг август ойи ўрталарида Дональд Трамп Мексика билан чегарани қора рангга бўяш ҳақида буйруқ берган эди. Трампнинг айтишича, шунда девор қуёшда қизиб кетиб, мигрантлар уни ошиб ўта олмайди.