АҚШ Конгресси Трампнинг Эрон уруши бўйича ваколатларини чеклади

АҚШ Вакиллар палатаси Президент Дональд Трампни Эрон билан можарони якунлаш ёки ҳарбий ҳаракатларни давом эттириш учун Конгресс розилигини олишга мажбур қилувчи резолюцияни қабул қилди. Бу ҳақда CBS News хабар берди.

Ҳужжат демократлар ва тўрт нафар республикачи конгрессменнинг қўллаб-қувватлаши билан 215 га 208 овоз нисбатида маъқулланди.

Маълум қилинишича, 22 май куни ушбу масалани кўриб чиқиш республикачилар позицияси сабаб ортга сурилган эди. Бироқ можаронинг чўзилиши ва Трамп маъмуриятининг урушни тугатиш борасида сезиларли натижага эриша олмагани фонида партия раҳбарияти етарли қўллаб-қувватловни тўплай олмаган.

Эндиликда резолюция Сенат кўриб чиқишига юборилган. Кутилишича, юқори палата ҳужжатни тахминан икки ярим ҳафта ичида муҳокама қилади.

Шу билан бирга, ҳужжат ҳар икки палата томонидан қабул қилинган тақдирда ҳам унинг якуний кучга кириши масаласи очиқлигича қолмоқда. Резолюция қонуний кучга эга бўлиши учун Президент Дональд Трамп уни имзолаши ёки Конгресс ҳар икки палатада учдан икки қисм овоз билан президент ветосини бекор қилиши керак бўлади.

Эслатиб ўтамиз, аввалроқ АҚШ ҳарбийлари Эроннинг нефть портига йўл олган нефть танкерини Hellfire ракетаси билан уриб, ҳаракатсиз ҳолатга келтирганди. АҚШ томони “блокада чоралари” Ботсвана байроғи остида сузаётган M/T Lexi танкерига нисбатан қўлланганини билдирган. Кема халқаро сувларда Харк ороли томон ҳаракатланаётган бўлган.