АҚШ Киевга 20 млрд доллар кредит ажратилишини эълон қилди

АҚШ Молия вазирлиги G7 (Еттилик гуруҳи) ташаббуси доирасида Украинага 20 миллиард доллар (19 миллиард евро) ажратилишини эълон қилди. Бу ҳақда кеча, 10 декабрь куни Қўшма Штатлар Молия департаменти хабар берди.

Вазирликка кўра, кредит Россиянинг музлатилган активларидан тушган маблағлар ҳисобидан тўланиши керак. G7 орқали тақдим этилган маблағларнинг умумий миқдори 50 миллиард долларни (47,5 миллиард евро) ташкил этади.

АҚШ Молия вазири Жанет Йеллен Украинага тез ёрдам хизматлари, шифохоналар ва жасоратли қаршилик кўрсатишнинг бошқа устунларини сақлаб қолиш учун молиявий ресурслар кераклигини таъкидлади.

“Бу маблағлар, Вашингтоннинг хавфсизликка ёрдами ва Россияга қарши санкцияларни кучайтириш чоралари Украинанинг ўз суверенитетини ҳимоя қилиш ва адолатли тинчликка эришишдаги позициясини мустаҳкамлайди”, деб таъкидлаган Йеллен.

Молия вазирлиги фавқулодда кредитлар бериш учун G7 механизмидан фойдаланилганини эслатди.

“Украинанинг қўллаб-қувватлаши АҚШнинг миллий манфаатлари учун ҳам ҳаётий аҳамиятга эга. Украинанинг қулашига йўл қўйилиши Путиндан кейинги тажовузга чорлайди ва НАТО бўйича Европадаги иттифоқчиларимизнинг хавфсизлигини хавф остига қўяди, биз уларни ҳимоя қилишимиз шарт”, дейилади вазирлик баёнотида.

Кредитни тўлаш режаси

Украинага Ғарб мамлакатларида музлатиб қўйилган Россия активларидан олинган даромадлардан фойдаланишни назарда тутувчи схема бўйича кредитлар бериш тўғрисидаги қарор жорий йилнинг июнь ойида G7 давлатлари томонидан қабул қилинган эди.

Режага кўра, Вашингтон Киевга 50 миллиард доллардан 20 миллиард доллар бериши керак эди, тахминан бир хил миқдорда ЕИга ҳисса қўшиш ваъда қилинган, яна 10 миллиард доллар эса Буюк Британия, Япония ва Канададан кутилган эди.

Кредит Украинага қарши уруш бошлагани учун Москвага қарши санкциялар доирасида Ғарб мамлакатларида блокланган Россия Федерацияси Марказий банкининг активлари бўйича автоматик равишда ҳисобланган фоизлардан фойдаланган ҳолда қайтарилади. Бу тахминан 280 миллиард долларни ташкил этади, уларнинг катта қисми Европа Иттифоқида блокланган. Ҳар йили Россиянинг музлатилган активлари, таҳлилчиларнинг фикрига кўра, 2,5-3 миллиард еврогача фойда келтиради.

Эслатиб ўтамиз, аввалроқ “Financial Times” АҚШ Украинага музлатилган Россия активларидан тушган фойда ҳисобига қайтариш шарти билан G7 кредити доирасида 20 миллиард долларгача маблағ ажратишга тайёрлиги ҳақида ёзганди.