АҚШ Хитой ва Россия ҳақидаги махфий маълумотларни “Беш кўз” билан бўлишмоқда – “The Times”

Қўшма Штатлар биринчи марта Австралия, Буюк Британия, Канада ва Янги Зеландияни ўз ичига олган “Беш кўз” разведка альянси аъзолари билан Россия ва Хитойнинг космик дастурлари ҳақида жуда нозик маълумотларни алмашишни бошлади. Бу ҳақда “The Times”газетаси хабар берди.

Нашр ёндашувнинг ўзгаришини “алоҳида аҳамиятга эга” воқеа деб атади. Гап АҚШ космик кучларининг ҳарбий орбитал операцияларга ихтисослашган Space Delta 9 бўлинмаси Колорадодаги базасида тўплаган маълумотлар ҳақида кетмоқда.

Илгари у фақат Америка ҳарбий қўмондонлиги учун мўлжалланган эди. Нашр маълумотларига кўра, Британиянинг Вашингтондаги стратегик қўмондонлик бўйича атташеси Н.Ж. Стрингер сўнгги бир неча ҳафта мобайнида бошқа мамлакатлар сунъий йўлдошларини кузатувчи АҚШ разведка дастури бўйича брифингда қатнашган.

Газетанинг ёзишича, Стрингерга АҚШ ҳарбий разведкасининг тактик операциялари, жумладан, Америка томонининг юқори аниқликдаги камера ёрдамида Россия ва Хитой сунъий йўлдошларига яқинлашиш усуллари кўрсатилган.

Камера сунъий йўлдошларни суратга олади ва улар Қўшма Штатларни хавотирга солиши мумкин бўлган фаолият билан шуғулланган ёки йўқлигини баҳолайди.

“The Times” газетасининг ёзишича, махфий маълумотларга киришга рухсат берилишига Вашингтоннинг Пекин ва Москва гўёки коинотда янги имкониятларни жадал ривожлантираётганидан хавотирлари сабаб бўлган. Хусусан, нашрнинг таъкидлашича, Хитой коинотда разведка маълумотларини тўплашга катта ҳажмдаги сармоя киритмоқда.

“Биз ҳеч ким хоҳламайдиган жангга тайёр бўлишимиз керак”, дейди Space Delta 9  қўмондони полковник Ремси Хорн.

Эслатиб ўтамиз, аввалроқ Хитойга тегишли “Чанъэ-6” зондининг қўниш ва учиш модули тупроқ йиғиш миссияси доирасида Ойнинг нариги томонида тўпланган тупроқ намуналарини Ерга олиб қайтганди. “Чанъэ-6” туширилган тупроқли капсула Хитой шимолига, Ички Мўғулистон автоном вилоятига қўнган. Шу билан Хитой Ойнинг узоқ томонидан намуналар тўплаган ва Ерга олиб келган биринчи давлатга айланди. 

Кейинчалик “Чанъэ-8” космик миссияси бош муҳандиси Пэя Чжаоюя Шанхайда ўтказилган тақдимотда Россия ва Хитой Халқаро Ой тадқиқот станцияси (IRLS) қурилиши доирасида Ой юзасида атом электр станцияси (АЭС) ўрнатишни режалаштираётганини айтди.