АҚШ Эрон уранни бойитишига рухсат бермайди – Трамп

АҚШ Президенти Дональд Трамп Вашингтон Теҳронга потенциал ядровий келишув доирасида уранни бойитишга рухсат бермаслигини айтди. Бу ҳақда Оқ уй раҳбари Truth Social тармоғида ёзди.

Унинг таъкидлашича, Оқ уйнинг аввалги маъмурияти Эронни анча олдин уранни бойитишдан тўхтатиши керак эди.

“Потенциал келишувимизга кўра, биз уранни ҳеч қандай бойитилишига йўл қўймаймиз”, деди Трамп.

Айни пайтда, “Axios” платформаси икки манбага таяниб, АҚШнинг ядровий келишув бўйича таклифи Эрон томонидан чекланган муддатга уранни паст даражада бойитиш учун рухсат беришни назарда тутганини хабар қилди.

Қайд этилишича, 31 май куни АҚШ Президенти Дональд Трампнинг махсус вакили Стив Уиткофф томонидан Эронга тақдим этилган таклиф лойиҳасида музокараларнинг навбатдаги босқичида муҳокама қилиниши режалаштирилган “дастлабки ғоялар” мавжуд.

Эрон-АҚШ ядровий музокаралари ва Трампнинг таклифи

Эрон ва АҚШ ўртасидаги ядровий музокаралар давом этар экан, уранни бойитиш масаласи икки томон ўртасидаги асосий тортишув нуқтаси бўлиб қолмоқда. Эрон ўзининг ядровий дастурини бомба ясай олмайдиган даражада чеклаш эвазига санкцияларни юмшатишни талаб қилмоқда.

Аввалроқ Теҳрон уранни паст даражада бойитаётганини таъкидлаган АҚШ расмийлари яқинда улар энди бойитишни бутунлай тўхтатишни талаб қилишаётганини айтди. Томонлар Уммон воситачилигида беш раунд музокара ўтказди. Навбатдаги учрашув вақти ва жойи ҳали маълум эмас.

АҚШ матбуоти 11 май куни Уммондаги музокараларда Эрон делегациясига ядровий келишув бўйича ёзма таклиф топширилганини хабар қилди. АҚШ Президенти Дональд Трамп ушбу таклиф ҳақида шундай деди:

“Аммо [Эрон] тезда ҳаракат қилиши керак, акс ҳолда ёмон нарсалар юз беради”.

Эрон Ташқи ишлар вазири Аббос Ароқчи, ўз навбатида, Трамп икки ҳафта аввал тилга олинган таклиф Уммон томонидан 31 май куни етказилганини тасдиқлади.