АҚШ элчиси QALAMPIR.UZ таҳририятида меҳмон бўлди

АҚШнинг Ўзбекистондаги элчиси Дэниел Розенблюм ва элчининг халқ дипломатияси бўйича маслаҳатчиси Анастасия Коливас QALAMPIR.UZ таҳририятига ташриф буюрди.

Жаноб Розенблюм таҳририятнинг янги биноси билан танишди. Бу ерда журналистлар учун яратилган шароитларни юқори баҳолади. Таҳририят жамоаси билан суҳбатда QALAMPIR.UZ мисолида Янги Ўзбекистоннинг янгиланиб бораётган оммавий ахборот воситаларини кўришини маълум қилди.

Ўз навбатида QALAMPIR.UZ асосчиси - журналист Қамариддин Шайхов сайт фаолияти, журналист кадрларга қўйилган талаблар, халқаро мавзуларни ёритишдаги тажриба ва сўз ва матбуот эркинлигининг амалдаги ифодаси хусусида маълумот берди.

Суҳбатда Ўзбекистон ва дунёдаги медиа муҳит, сўз ва матбуот эркинлиги, цензура, журналистларга нисбатан босим ва таҳдидлар, ОАВ фаолиятига тўсқинликка нисбатан қонуний жавобгарликни белгилаш ва бу масалада ишлаб чиқилаётган қонун лойиҳаси, инсон ҳуқуқлари масалалари муҳокама қилинди.

Жаноб Розенблюм ўз сўзида АҚШ ва Ўзбекистон муносабатларида ОАВга яратиб берилган шароит, мамлакатдаги сўз ва матбуот эркинлиги муҳим аҳамият касб этишини билдирди.