АҚШ давлат қарзи тарихда илк бор 39 трлн доллардан ошди

АҚШ давлат қарзи тарихда биринчи марта 39 триллион долларлик кўрсаткичдан ўтди. Бу ҳақда АҚШ Молия вазирлиги материалларида келтирилган.

Қайд этилишича, кеча, 18 март ҳолатига кўра, АҚШнинг жами қарз мажбуриятлари ҳажми тахминан 39,03 триллион долларни ташкил этган. Мамлакатнинг ҳар бир резидентига тўғри келадиган қарз миқдори 114,1 минг доллардан ошиб, рекорд даражага етган.

Экспертларнинг эслатишича, АҚШ давлат қарзи 38 триллион долларлик довондан ўтган йилнинг октябрь ойидаёқ ўтган эди. Халқаро валюта жамғармаси (ХВЖ) таҳлилчиларининг прогнозларига кўра, ушбу ўн йилликнинг охирига бориб бу кўрсаткич мамлакат ялпи ички маҳсулотининг (ЯИМ) 143,4 фоизига етади.

Давлат қарзи ҳажмини камайтириш АҚШ Президенти Дональд Трамп сайловолди дастурининг асосий бандларидан бири эди. Бироқ унинг иккинчи президентлик муддати бошланганидан бери бу кўрсаткич рекорд даражада тез ўса бошлади. Дональд Трамп иккинчи президентлигининг биринчи йили якунларига кўра, Қўшма Штатларнинг қарз мажбуриятлари ҳажми 2,25 триллион долларга ошган.

Эслатиб ўтамиз, глобал молиявий шароитларнинг юмшаши, АҚШ долларининг заифлашиши ва асосий марказий банкларнинг муросали сиёсати туфайли 2025 йилнинг иккинчи чораги охирида жаҳон қарзи рекорд даражага – 337,7 триллион долларга чиққанди.