АҚШ аҳолиси Мустақиллик куни учун Трампга “совға” тайёрлаяпти – ОАВ

Эртага, 4 июль АҚШнинг Мустақиллик куни муносабати билан мамлакатнинг кўплаб шаҳарларида Президент Дональд Трамп сиёсатига қарши оммавий норозилик намойишлари ўтказилиши режалаштирилган. Бу ҳақда “Axios” хабар берди.

Нашр маълумотларига кўра, “Америкага озодлик” номи остида ўтказиладиган бу митинглар мамлакатнинг Мустақиллик кунига тўғри келади. Таъкидланишича, бу ҳаракатлар Трамп маъмуриятидан норозилик кайфиятининг кучайиб бораётган фонида аввалги норозилик тўлқинининг қайта бошланиши сифатида қаралмоқда.

Акция ташаббускори сифатида “Аёллар юриши” ташкилоти кўрсатилган. Улар ўз веб-сайтида режалаштирилган норозилик тадбирлари ҳақида маълумот жойлаштирган. Ташкилотчилар митинглар, юришлар, баннерлар илиш, рақсли норозилик чиқишлари ва маҳаллий байрамларни ўтказишга чақирмоқда.

Ҳозиргача мамлакат бўйлаб 200 га яқин тадбир режалаштирилган, бу эса яқинда ўтказилган “Қиролларга йўқ” протестларига нисбатан қизиқишнинг нисбатан паст эканини кўрсатмоқда.

“Таниқли озодлик ва қувонч қўшиқлари билан 4 июль куни биз кўчаларга чиқамиз. Америка озодлиги орзуси барчамизга тегишли ва биз бу ваъданинг рўёбга чиқиши йўлида тўхтамаймиз – ҳозир ҳам, кейин ҳам”, дейилади ташкилот сайтида.

“Аёллар юриши”, шунингдек, бу ҳаракатлар “АҚШни миллиардерлар ҳокимияти, қашшоқлик, ноқонуний фармонлар ва қўрқув сиёсатидан озод қилиш”га қаратилганини билдирган. Шу билан бирга, “Axios” нашри Оқ уйдан режалаштирилган намойишлар бўйича изоҳ сўраган.

“Президент Трамп қарийб 80 миллион овоз олди ва Американи яна буюк қилиш бўйича тарихий мандатни қўлга киритди – у буни катта миқёсда амалга оширяпти”, деган Оқ уй вакили Лиз Хюстон ўз баёнотида.

Эслатиб ўтамиз, жорий йилнинг 4 июнь куни – Дональд Трампнинг туғилган кунида АҚШнинг барча штатларида амалдаги Президент сиёсатига қарши намойишлар бўлиб ўтган эди. Шундан сўнг бутун дунё эътиборини Лос-Анжелесдаги норозилик ҳаракатларига қаратди. У ерда маҳаллий аҳоли билан федерал агентлар ўртасидаги зиддиятлардан митинглар бошланган, кўчаларнинг қисман ёпилиши, полиция билан тўқнашувлар, кўздан ёш оқизувчи газ ва шовқинли гранаталар қўлланилиши юзага келган, норозилар эса бунга мушаклар билан жавоб қайтарган.

Шундан сўнг Президент Трамп Лос-Анжелесга Миллий гвардия кучларини киритиш буйруғини берган. Бунга жавобан Калифорния бош прокурори Трамп маъмуриятини судга берган, губернатор эса Трампнинг бу ҳаракати “зўравонликни авж олдириб, тинч намойишларнинг тартибсизликларга айланишига сабаб бўлди” деб баёнот берган.