АҚШ ҳарбийларининг бир қисмини Польшага кўчирди

АҚШ Польшага Техасдаги Биринчи кавалерия дивизияси бўлинмаларини кўчирмоқда. Бу ҳақда Польша Миллий хавфсизлик бюроси (BBN) директори Бартош Гродецкий маълум қилди.

Қайд этилишича, Польшадаги Америка қўшинлари сонининг айни пайтдаги ўзгариши АҚШ Қуролли кучларининг давом этаётган ротацияси (алмашинуви) билан боғлиқ бўлиб, у Техаснинг Форт-Худ базасидаги АҚШ Биринчи кавалерия дивизияси томонидан амалга оширилмоқда. Форт-Худдан Польшага режалаштирилган қўшинлар миқдорининг 20 фоиздан ортиғи, шунингдек, ҳарбий техниканинг қарийб 70 фоизи кўчириб бўлинган.

Бундан бир неча кун аввал “The Wall Street Journal” (WSJ) газетаси АҚШ Европадаги ўз ҳарбий иштирокини қисқартириш қадамларидан бири сифатида Польшага зирҳли танклари бригадасини юборишни тўсатдан тўхтатишга қарор қилгани ҳақида ёзган.

Шу билан бирга, Польша Мудофаа вазири Владислав Косиняк-Камиш америкаликларнинг ушбу қадами Варшавага “дахл қилмаслигини”, балки “АҚШ Қуролли кучларининг Европадаги иштирокини ўзгартириш бўйича аввалроқ эълон қилинган режа” билан боғлиқ эканлигини билдирган.

Эслатиб ўтамиз, аввалроқ Президент Дональд Трамп Америка Қўшма Штатлари қўшинларини Германиядан Польшага кўчириши мумкинлигини айтган эди.