Африкалик футболчи ўйин вақтида тангага бўғилиб вафот этди (видео)

Бурунди чемпионатининг иккинчи дивизионида иштирок этувчи “Гепье дю Лак” клуби футболчиси Игиранеза Айме Герик ўйин вақтида фожиали тарзда вафот этди. Бу ҳақда “Sport News Africa” хабар берди.

Манбага кўра, воқеа жорий йилнинг 20 декабрь куни Нгарага шаҳрида бўлиб ўтган Бурунди Б лигаси учрашуви чоғида содир бўлган. Герик ўйин давомида тўсатдан майдонда ҳушидан кетган. Шифокорлар томонидан кўрсатилган тезкор тиббий ёрдамга қарамай, футболчи шифохонага олиб кетилаётганда вафот этган.

Манбада таъкидланишича, футболчининг ўлимига унинг оғзида бўлган ва тасодифан ютиб юборган танга сабаб бўлган. Ушбу танга омад келтиришига ишонилган. Шу сабабдан футболчи тангани оғзига солган ҳолда ўйинда ҳаракат қилган.

Бурунди футбол федерацияси футболчининг оиласи ва клубига ҳамдардлик билдириб, расмий баёнотда ўлим сабабига аниқлик киритмаган.

Эслатиб ўтамиз, аввалроқ “Штутгарт” жамоасининг собиқ германиялик футболчиси Себастьян Хертнер Черногориядаги чанғи курортида содир бўлган бахтсиз ҳодиса оқибатида 34 ёшида вафот этган эди.