Абдусатторов халқаро турнирда америкалик гроссмейстерни мағлуб этди

Айни кунларда шахмат бўйича халқаро “Aimchess Rapid” онлайн турнирининг 4-босқич баҳслари ўтказилмоқда. Мусобақада иштирок этаётган ўзбекистонлик гроссмейстер Нодирбек Абдусатторов ярим финал йўлланмасига эга чиқди.

4-босқичнинг 1-турида Абдусатторовга америкалик гроссмейстер Уэсли Со рақиблик қилди. Томонлар умумий 5 та партияда ярим финал йўлланмаси учун куч синашди. Дастлабки икки партияда дуранг қайд этилди. 3-партияда Сонинг қўли баланд келган бўлса, 4-партияда Абдусатторов ғалаба қозонди. Ҳал қилувчи 5-партияда ҳам ўзбекистонлик шахмат устасининг қўли баланд келди. 

Шундай қилиб, умумий 3:2 ҳисобида зафар қучган Абдусатторов турнирнинг ярим финалига йўл олди. Ярим финалда Нодирбекка арманистонлик Левон Аронян рақиблик қилади. 

Таъкидлаш жоиз, Абдусатторов иштирок этаётган дивизионда Уэсли Со ва Левон Ароняндан ташқари Владимир Федосеев, Фабиано Каруана, Эдуардо Бонелли, Йорден ван Форест ва Магнус Карлсен каби гроссмейстерлар ғолиблик учун кураш олиб бормоқда.