“40 миллион ҳам кам!” Аёллар эркаклардан катта маош хоҳлаяпти.

Шарқ маданиятидан қонимизга сингдирилган бир тушунча борки, эркаклар оилада рўзғорни тебратиши, турмуш ўртоғи ва фарзандларини моддий томондан тўлиқ таъминлаши керак. Бироқ, Ўзбекисон шароитида ойлик маошларнинг унчалик баланд эмаслиги ҳеч ким учун сир эмас. Бунда, албатта, хусусий тадбиркорлик маошлари алоҳида мавзу.

Лекин, эркаклар орасида давлат ташкилотларида ишлайдиган ва шу орқали рўзғорини тебратадиганлар кўпчиликни ташкил этади. Хўш, Ўзбекистонда эркаклар қанча маош олиши керак?

QALAMPIR.UZ мазкур савол билан пойтахт аёлларига юзланди.

“Эркаклар рўзғоринг ками кўстини тўлдириш учун кўп ишлаши керак. Оила тебратиш осон иш эмас. Бу фарзандлар сонига ҳам боғлиқ. Ҳозирги вақтда айниқса Тошкент шароитида камида 10 миллион ишлаб топмасангиз яшашингиз қийинлашиб бораверади”, деди аёллардан бири.

Дарҳақиқат, респондент аёлларнинг кўпчилиги ўртача хисобда ўн миллион маош оила харажатлари учун етарли, деб ҳисоблайди.

Шунингдек, уларнинг орасида ҳатто 30-40 миллион сўмлик маош ҳам бир оилага етмаслигини айтганлар ҳам бор.

Бунга сабаб сифатида эса улар пойтахтда яшаш қийин бўлиб кетаётгани, ижара хақлари ёки озиқ-овқат нархларида йилдан йилга катта осиш кузатилаётганини кўрсатишди.

Қолаверса, эркаклар шароитдан келиб чиқиб, имкон қадар кўпроқ пул топишга ҳаракат қилаётганини айтганлар ҳам йўқ эмас:

“Оилада фақат эркак ишласин деган қоида йўқ. Аёл ҳам турмуш ўртоғига ёрдам бериши керак. Иккиси ҳам биргаликда рўзғор тебратиши оила буджетига анча фойда келтиради”, дейди аёллардан бири.

QALAMPIR.UZ аёлларнинг бу “талаб”ига эркаклар жавоб бера олиши ёки йўқлигини ўрганиш мақсадида бир қанча эркакларга ҳам микрафон тутди.

Афсуски, сўровномада қатнашган аксарият эркаклар реал даромади аёллар хоҳлаётган маошдан 2-3 баробар камлигини билдирди.

“Ойига кўпи билан 3 миллион ишлаб топаман. Бир аммаллаб оиламни боқаяпман. Нима қилай, ишламасам нонни ким беради? Ўзбекистонда иш топиш ҳам, пул топиш ҳам катта муаммо”, дейди эркаклардан бири.

Айрим эркаклар эса давлат ишида ишлаши, ойлик маоши рўзғор учун етаётганидан мамнунлигини билдирди.

QALAMPIR.UZ сўровномасининг тўлиқ шаклини эса қуйидаги ҳавола орқали кўришингиз мумкин.

Акобир Мисиралиев