3 кунлик “Дунё садолари” якунига етди. Ҳоким фестивалнинг асл мақсадини айтди

2025 йилнинг 15 августида бошланган 3 кунлик анъанавий “Дунё садолари” фестивалининг охирги куни бўлиб ўтди. Тадбирнинг биринчи оқшомига 150 мингдан, иккинчи куни эса 200 мингдан ортиқ одам ташриф буюрган. Сўнгги кечада бу кўрсаткич 250 мингдан ошди. Фестивалнинг биринчи куни “Arabesque” гуруҳи, Алиша Чинай, Ин-Грид ва Муниса Ризаевалар чиқиш қилган бўлса, иккинчи кунда Имрон, Шоҳруҳхон, Севинч Мўминова ва Мустафо Сандаллар куйлади. Тадбирнинг сўнгги кунида Жалолиддин Аҳмадалиев, Сетора гуруҳи ва жаҳон юлдузи Араш даврани қиздирди.

“Энг асосийси, биринчи кун 150 минг, кеча 200 минг, бугун 250 минг халқ келди. Қўшни Қирғизистондан кирадиган постлардан рақамларни оляпмиз, оддий кунларда Хонобод постидан 2,5 – 3 минг одам ўтган бўлса, ҳозир 33 мингга чиқди. Ҳар биттаси кираётганда нимадир сотиб олади, энг асосийси, Хонободда бугун одамларимизнинг яшаш маданияти ҳам ўзгаряпти фестиваль орқасидан. Нега? Уй меҳмонхоналари, мингдан ортиқ далаҳовлилар пайдо бўляпти. Бугун битта далаҳовлининг бир суткаси 300 АҚШ доллари. Бу пулга ким турарди агар фестиваль бўлмаганда? Қолаверса, фестиваль уч кунлик санъат эмас, биз бир ойлик эълон қилганмиз. Спорт тадбирлари ўтказдик, “Баҳодирлар ўйини”га 26 давлатдан келишди, ҳар битта спортчининг орқасидан ўнлаб мухлислари келяпти ёки кураш мусобақасини ўтказдик, 195 та полвон қатнашди. Уларни орқасидан одамлар келди. Яна бир марта айтаман, албатта, ҳаммаси Андижонда, Хонободда туризмни ривожлантиряпти, ҳудуд ижтимоий-иқтисодий ривожланиб боряпти”, деди Андижон вилоят ҳокими Шуҳрат Абдураҳмонов.

Меҳмон хонанда сифатида таклиф этилган эронлик қўшиқчи Араш эса Ўзбекистонда илк бор 15-20 йил йил аввал бўлганини, мамлакат тўғри йўлда жадаллик билан ривожланаётганини кўриб севинишини айтди.

“Мен ҳозир Тошкентда эмас, мамлакат чеккасидаман, лекин бу ер менга жуда ёқди. Мен Ўзбекистонни, ўзбек халқини севаман. Мен бу ерга кўп келаман ва доим дўстона муҳитни ҳис қиламан. Умид қиламанки, бундай гўзал жойларга сафарларим яна кўп бўлади”, деди у QALAMPIR.UZ журналистига берган интервьюсида.

Шуҳрат Абдураҳмонов бу каби тадбирларнинг аҳамияти ҳақидаги саволга ҳам жавоб бериб, “Дунё садолари” фестивалини ўтказишдан асл мақсад Хонободни туризм шаҳрига айлантириш, ижтимоий-иқтисодий жиҳатдан ривожлантириш эканини билдирди.

“Фестиваль учинчи йил бўляпти, уч йилда шунчалик нуфузи ортди. Бунинг орқасида қанча халқнинг Хонободда иқтисоди яхшиланяпти, қанча тадбиркорлик кўпайяпти, қанча солиқ тушумлари бўляпти”, деди у.

Биз тадбирда микрофон тутган қирғизистонлик меҳмон, мутасаддилар таъкидлаганидек, фестивалда иштирок этиш учун атайлаб оиласи билан қўшни республиканинг Жалолобод шаҳридан оилавий келганини ва бундай тадбирлар фонида икки халқнинг дўстлиги ҳеч қачон узилмаслигини тилади. 

Шундай қилиб, 3 кун давом этган ва умумий ҳисобда 600 минг одам ташриф буюрган 2025 йилги “Дунё садолари” фестивали ўз ниҳоясига етди. Тадбирга қилинган сарф-харажатлар ва тушум тез орада оммага эълон қилиниши айтилди.