Покистон собиқ бош вазири тарафдорлари билан полиция ўртасида тўқнашувлар бўлиб ўтди

Бугун, 15 март куни Покистон полицияси ва собиқ Бош вазир Имрон Хоннинг тарафдорлари ўртасида тўқнашув бўлди. Бу ҳақда “Associated Press” хабар берди.

Қайд этилишича, полиция Имрон Хонни қўлга олиш учун шарқий Лаҳор шаҳридаги уйига келган. У ерда эса бир гуруҳ Имрон Хон тарафдорлари полицияга қарши чиққан. Охирги 18 соат давомида 70 ёшли мухолифат етакчиси тарафдорлари зобитларга қарата тош ва ғишт отаётган пайтда полиция кўзни ёшлантирувчи газдан фойдаланган.

Манбага кўра, Хон яшайдиган Замон боғининг юқори ҳудуди 14 мартдан бери қамалда бўлган. Хоннинг юзлаб тарафдорлари кутилмаган қатъият кўрсатганидан сўнг ҳукумат вазиятни ҳал қилиш учун қўшимча полициячиларни юборишга мажбур бўлган.

15 март куни эрталаб Хон уни ҳибсдан қутқариш учун полициянинг кўзни ёшлатувчи газ ва таёқлари ҳужумига тун бўйи қарши тура олган ўз тарафдорлари билан учрашишга уйидан чиққан. У ҳибсга олиш ордери остида 18 март куни Исломободга боришга тайёрлигини айтган, бироқ полиция бу таклифни қабул қилмаган.

Тўқнашувлар оқибатида ўнга яқин полициячи ва Хоннинг 35 га яқин тарафдори яралангани хабар қилинган. 

Маълумот учун, 2022 йил апрель ойида парламентдаги ишончсизлик вотуми натижасида ҳокимиятдан четлатилган Хонга бош вазирлик даврида олган давлат совғаларини ноқонуний сотиш ва мол-мулкини яшириш айбловлари қўйилган. Имрон Хон ўзига қўйилган айбловлар амалдаги Бош вазирнинг уни обрўсизлантиришга қаратилган режасининг бир қисми эканини айтган. Шаҳбоз Шариф эса Хонни ҳибсга олиш суд қарори экани, бунда ҳеч қандай сиёсий таъсир йўқлигини билдирган.