Сибирни “ўзбеклар юрти” деб атаган депутат лавозимидан воз кечди 

Аввалроқ, Россиянинг Ханти-Мансийск округи думасининг Коммунистик партиядан сайланган депутати Холид Таги-Заде Сибир ўлкаси ўзбекларнинг тарихий маскани эканини айтганди. У ушбу гапи норозиликларга сабаб бўлгани учун муддатидан илгари ваколатидан воз кечди. Бу ҳақда “Коммерсантъ” хабар берди.

Холид Таги-Заденинг сўзлари жамоатчиликда катта шов-шувга сабаб бўлган. Аввалига у экстремизмда гумон қилиниб текширувга тортилган, сўнгра эса маош тўланадиган лавозимидан четлаштирилган. Бироқ прокуратура ҳам, Ички ишлар вазирлиги ҳам унинг сўзларида жиноят аломатларини аниқламаган. Сиёсатшуносларнинг фикрича, Таги-Заде миграцияга қарши умумий кайфият фонида “йўлни йўқотган”. 

Маълумот учун, Холид Таги-Заде 1978 йил 15 ноябрда Озарбайжон ССРнинг Сумгаит шаҳрида туғилган. Миллати – озарбайжон. У 2001 йилда Сибирь федерал университетини “криминалистик кимё” ихтисослиги бўйича тамомлаб, кимёчи мутахассислигига эга бўлган. Бир вақтнинг ўзида С.А. Решетнёв номидаги Сибирь аэро-космик академияси ҳарбий факультетида ҳам таҳсил олган. 

У 2019 йилдан 2021 йилгача Мегион шаҳар Думасининг олтинчи ва еттинчи чақириқлари депутати, Мегион шаҳар Думасидаги Россия Федерацияси Коммунистик партияси фракцияси раҳбари, 2021 йилдан бери эса Ханти-Мансийск автоном округи Думаси – еттинчи чақириқ Угра депутати сифатида ишлаб келмоқда. 

Эслатиб ўтамиз, Холид Таги-Заде май ойидаги парламент мажлисида Юграда мигрантлар орасида туғилиш кўрсаткичи ортгани муҳокама қилинаётганида Ханти-Мансийск ва Тюмень вилоятининг бир қисмини “тарихан Сибир хонлиги” деб атаган эди. У минтақада Кўчум Хон ҳукмронлик қилганини, у Бухоро хонлигидан чиққан Шайбонийлар сулоласининг вакили – ўзбек сулоласидан эканини айтган.

Унинг бу баёноти Коммунистик партия, Либерал-демократик партия ва “Ягона Россия” партияларининг Давлат думасидаги депутатлари эътиборини тортган ва улар Федерал хавфсизлик хизмати ҳамда Бош прокуратурани Таги-Задени текширишга чақирган. Шундан сўнг, ХМАО думаси уни ижтимоий ривожланиш бўйича қўмита раиси ўринбосари лавозимидан ҳам четлатган. Спикер Хохряков эса, агар ҳуқуқий асос топилса, унинг депутатлик ваколатидан бутунлай маҳрум қилиш масаласи ҳам кўриб чиқилишини айтган.