Ҳудудларнинг Россия томонидан аннексия қилинишини тан олмаймиз – Зеленский

Украина ҳозирда Россия томонидан босиб олинган ўз ҳудудларини аннексия қилишни “ҳеч қачон” тан олмайди, ҳатто бу тинчлик келишувига эришиш учун зарур бўлса ҳам. Бу ҳақда кеча, 2 март оқшомида Украина Президенти Владимир Зеленский Европа етакчиларининг Лондондаги саммитидан сўнг британиялик журналистлар билан суҳбатда айтиб ўтди.

Украина раҳбарининг таъкидлашича, Киев Россия томонидан босиб олинган ҳудудларни ҳар доим “вақтинчалик босқинчилик” деб ҳисоблайди, гарчи мамлакат ҳозирда Россияни бутунлай сиқиб чиқариш учун етарли ҳарбий кучга эга эмас бўлсада.

“Бизнинг ҳудудларимиз ва қадриятларимиз сотилмайди. Бизнинг эркинлигимиз сотилмайди. Россия бизни бу ишга тортганлиги учун биз катта нарх тўлаяпмиз”, деди Зеленский.

Унинг қўшимча қилишича, Украина ишончли хавфсизлик кафолатлари билан таъминланган тақдирдагина сулҳни қабул қилади. Зеленский бундай кафолатлар Украинадаги янги ҳарбий ҳаракатларни Россия учун имконсиз қилишига ёки Москва буни қабул қилса, Украина ва унинг иттифоқчиларининг “қаттиқ жавобига” олиб келишига умид билдирди.

Франция ва Британия Россия ва Украина ўртасида бир ойлик қисман сулҳ тузишни таклиф қилмоқда. Франция раҳбари Эммануэль Макроннинг “Le Figaro” газетасига берган интервьюсида маълум қилишича, ўт очишни тўхтатиш ҳаво ва денгиз зарбалари ҳамда энергетика инфратузилмасига ҳужумларни тўхтатишга қадар чўзилиши мумкин.

Шу билан бирга, Макрон ўт очишни тўхтатган тақдирда “бу фронтда кузатилаётганлигини текшириш жуда қийин бўлишини” таъкидлаб, фронт чизиғи узунлиги Париждан Будапештгача бўлган масофага тенг эканлигини қўшимча қилди.

Франция-Британия таклифига кўра, Европа қуруқлик қўшинлари Украинага тинчлик режасининг иккинчи босқичидагина киритилади.

“Яқин ҳафталарда Украина тупроғида Европа қўшинлари бўлмайди”, дейди Макрон.

Британия Бош вазири Кир Стармер Лондондаги саммитдан сўнг тўрт нуқта келишилганини айтди. Шундай қилиб, Украинага ҳарбий ёрдам беришни давом эттириш ва Россияга иқтисодий босимни кучайтиришга қарор қилинди. Раҳбарлар ҳар қандай барқарор тинчлик Украина суверенитети ва хавфсизлигини таъминлаши, Киев эса ҳар қандай тинчлик музокараларида иштирок этиши кераклиги ҳақида келишиб олди.

Агар тинчлик келишувига эришилса, сиёсатчилар келажакда Москва томонидан бостириб киришининг олдини олиш учун Украина мудофаа қобилиятини кучайтиришга ваъда беришди.

Бундан ташқари, Украина ва тинчлик кафолатлари бўйича келишувга эришишга тайёр давлатлар коалициясини тузишга қарор қилинди.