Ҳиндистондаги сайловларда Модининг партияси ғалаба қозонди

Ҳиндистондаги умумий сайловларда кўпчилик овозлар ҳисоблаб чиқилгач, Бош вазир Нарендра Моди бошчилигидаги партиялар иттифоқи парламентда ҳукуматни шакллантириш учун етарлича ўринни эгаллади. Бу ҳақда BBC хабар берди.

Сайлов комиссиясининг маълум қилишича, Моди бошчилигидаги “Бҳаратия Жаната” партияси етакчилигидаги ҳукмрон альянс Ҳиндистон парламентидаги 543 ўриндан 286 тасини қўлга киритган.

Бироқ, партиянинг ўзи 240 та тасдиқланган мандатга эга бўлиб, мутлақ парламент кўпчилигини йўқотди. Шу билан бирга, Моди партия олдига парламентдаги 400 ўринни қўлга киритиш вазифасини қўйганди.

Ҳиндистон Миллий Конгресси партияси етакчилигидаги INDIA мухолифат альянси 193-ўринни қўлга киритган, бу эса кутилган натижалардан анча юқори деб баҳоланган.

INDIA мухолифат етакчиси Раҳул Гандига кўра, Бош вазир ўзининг энг улуғвор режаларидан, жумладан, конституцияни ўзгартириш билан боғлиқ режаларидан воз кечишига тўғри келади.

Гандилар сулоласи партияси бўлган Ҳиндистон Миллий Конгресси 2014 йилга қадар мамлакатни бошқарган ва у илк бор миллатчи “Бҳаратия Жаната” партиясидан мағлуб бўлган. Бу сайловларда у алоҳида-алоҳида 99 мандат олган.

Раҳул Гандининг ўзи бош вазир Ражив Гандининг ўғли, бош вазир Индира Гандининг набираси, Ҳиндистоннинг биринчи бош вазири Жавоҳарлал Нерунинг невараси, лекин Маҳатма Гандининг авлоди эмас. У номзоди кўрсатилган иккала сайлов округида ҳам ғалаба қозонган. Лекин у парламентда қайси округдан вакиллик қилмоқчи эканлигини ҳали тасдиқламаган.

Нарендра Моди сайловлардаги ўз ғалабасини нишонлар экан, янги ҳукуматни шакллантиришга тайёр эканини, шунингдек, у баъзи ҳудудларда, жумладан Деҳлида ҳам ўз партияси тарафдорлари сони икки баравар кўпайганини таъкидлаб, коррупцияни илдизи билан йўқ қилиш учун ҳамма нарсани қилишга ваъда берди ва мудофаа соҳаси, ёшлар ва фермерларни қўллаб-қувватлаш ниятида эканига ишонтирди.

Маълумот учун, сайёрадаги энг йирик сайловлар олти ҳафта давомида бўлиб ўтган, унда деярли 1 миллиард одам овоз бериш ҳуқуқига эга эди. Натижада мамлакат бўйлаб 640 миллиондан ортиқ сайловчи овоз берган. Шу билан бирга, миллий сайловлар ҳаддан ташқари иссиқлик даврига тўғри келиб, бир қанча шаҳарларда ҳаво ҳарорати 45 даражадан ошган ва ўнлаб одамлар жазирамадан ҳалок бўлган.