Ҳиндистондаги даҳшатли авиаҳалокатнинг сабаби аниқланди

Ҳиндистон Авиация ҳодисаларини тергов қилиш бюроси Air India авиакомпаниясига тегишли Boeing 787-8 Dreamliner самолётининг ҳалокатини тергов қилиш бўйича комиссиянинг дастлабки ҳисоботини эълон қилди. Бу ҳақда “Channel News Asia” хабар берди.  

Мазкур ҳужжатга кўра, самолёт ҳавога кўтарилгандан атиги уч сония ўтиб, двигатель ёнилғи тизимидаги калитлар ўчиб қолган, бунинг оқибатида двигателларга ёқилғи етказилиши тўхтаган.

15 бетлик ҳисоботда айтилишича, самолёт максимал тезликка эришган заҳоти 1 ва 2-сонли двигателлардаги ёнилғи калитлари кетма-кет, ҳар бири бир сониялик фарқ билан “Ишга тушириш” ҳолатидан “Ўчириш” ҳолатига ўтган.

Учувчилар кабинасидаги аудиоёзувда бир учувчининг бошқасидан “Нега ёнилғини тўсиб қўйдинг?” деб сўрагани, иккинчисининг эса “Мен ҳеч нима қилмадим” деб жавоб бергани қайд этилган.

Шундан сўнг, самолёт баландликни тез йўқота бошлаган. Калитлар қайтадан “Ишга тушириш” ҳолатига ўтказилган ва двигателларда куч қайта пайдо бўлгандек бўлган, аммо пилотлардан бири фавқулодда ҳолат сигнали узатган.

Ҳалокат жойида ёнилғи калитлари ишчи ҳолатда топилган. Ҳисоботга кўра, бу калитлар қулашдан бироз олдин қайта ёқилган бўлиши мумкин.

АҚШ авиация хавфсизлиги эксперти Жон Кокснинг таъкидлашича, бундай калитларни учувчилар тасодифан ўчириб қўя олмайди – улар фақат фавқулодда ҳолатларда, масалан, двигатель ёнғинида ўчирилади. Аммо бундай ҳолат ҳисоботда қайд этилмаган.

Эслатиб ўтамиз, жорий йилнинг 12 июнь куни Гужарат штатининг Аҳмадобод шаҳри яқинида Air India авиакомпаниясининг самолёти ҳавога кўтарилганидан кўп ўтмай қулаб тушганди. Бортда 242 киши, жумладан, 2 учувчи ва 10 борт кузатувчи бўлган.

Самолёт шифокорлар учун мўлжалланган ётоқхонага урилиши оқибатида нафақат самолётдаги йўловчилар, балки бинода бўлган кишилар ҳам ҳалок бўлди. Қурбонлар сони 290 кишига етган.

Фожиада омон қолган ягона йўловчи Буюк Британия фуқароси Вишвакумар Рамеш бўлиб, у журналистларга ҳодиса тафсилотларини сўзлаб берган.