Ҳиндистон биринчи чипини ишлаб чиқармоқда

Ҳиндистон ўзининг биринчи чипини 2025-йилда ишлаб чиқаради. Бу ҳақда мамлакат жанубидаги Ҳайдаробод шаҳрида бўлиб ўтган анжуманда сўзлаган мамлакат Ахборот технологиялари вазири Ашвини Ваишнав маълум қилди.

Унинг сўзларига кўра, Ҳиндистон жаҳон яримўтказгич бозорида муҳим ўйинчи бўлишга тайёр.

“Ҳозир биз яримўтказгичли чиплар ишлаб чиқаришни йўлга қўймоқдамиз. Биз аллақачон олтита ярим ўтказгич заводи қурилишини тасдиқладик. Уларнинг қурилиши давом этмоқда. Ҳиндистонда ишлаб чиқарилган биринчи чип 2025 йилда чиқарилади”,  деди у.

Ҳиндистон ҳукумати аввалроқ мамлакатда яримўтказгичлар ишлаб чиқариш саноатини яратиш нияти борлигини маълум қилган эди. Шу мақсадда расмийлар хорижий компанияларни фаол жалб қилмоқда.

Ҳиндистон электроника ва яримўтказгичлар ассоциацияси маълумотларига кўра, Ҳиндистон яримўтказгич бозорининг ҳажми 2030 йилга келиб 100 миллиард доллардан ошади.