Зилзилада шифокорлар беморни ўз танаси билан ҳимоя қилди (видео)

Япониянинг Яцусиро шаҳридаги “Kumamoto General Hospital” шифокорлари кучли зилзила вақтида операция қилинаётган беморни ўз таналари билан ҳимоя қилди. Воқеа акс этган видеолавҳани “NHK World Japan” эълон қилди.

Маълум қилинишича, зилзила пайтида шифохонада бир вақтнинг ўзида тўртта операция давом этаётган бўлган. Тарқалган кадрларда операция хонасида шифтга осилган тиббий жиҳозлар кучли тебранаётгани, хонадаги буюмлар эса ерга сочилиб кетгани кўринади.

Шифокорлар операция столида ётган беморни жиҳозлар қулаши мумкин бўлган ҳолатдан ҳимоя қилиш учун уни ўз таналари билан тўсиб турган. Шу пайтда ҳамширалар эса зарурат туғилганда бемор ва ходимларни эвакуация қилиш учун йўлакларни очган.

Кучли силкинишларга қарамай, тиббиёт ходимлари вазият барқарорлашгунча бемор хавфсизлигини таъминлашда давом этган.

Эслатиб ўтамиз, жорий йилнинг 28 июль куни Япониянинг жанубидаги Кумамото префектурасида 7,1 магнитудали зилзила содир бўлгани ҳақида хабар берилган эди.