JSST “Tolibon” qo‘liga o‘tgan Afg‘onistonga birinchi marta yordam jo‘natdi

Afg‘oniston “Tolibon” harakati nazorati ostiga o‘tganidan so‘ng, Jahon sog‘liqni saqlash tashkiloti mamlakatga birinchi marta tibbiy materiallar yubordi.  

“Dushanba kuni Dubaydan (BAA) Mozori-Sharifga 12,5 tonnaga yaqin turli xil yuklar samolyotda yetkazib berildi”, deb xabar bergan JSSTning Jenevadagi bosh qarorgohi. 

Ta’kidlanishicha, JSSTning dori-darmonlari va materiallari bo‘lgan samolyot kecha, 30 avgust kuni mahalliy vaqt bilan soat 12:25 da qo‘ngan. Bu mamlakat “Tolibon” nazorati ostiga o‘tganidan beri Afg‘onistonga havo orqali jo‘natilgan birinchi tibbiy yordamdir. 

“Biz Afg‘onistondagi sog‘liqni saqlash muassasalari zaxiralarini qisman to‘ldirishga muvaffaq bo‘ldik va JSST tomonidan qo‘llab-quvvatlanadigan sog‘liqni saqlash xizmatlari hozircha o‘z faoliyatini davom ettirishini ta’minladik”, degan JSSTning O‘rta yer dengizi bo‘yicha mintaqaviy direktori Ahmad Al-Mandari. 

Qayd etilishicha, 12,5 tonna turli xil tibbiy buyumlar, shu jumladan yaradorlarni davolash uchun mablag‘ yetkazib berilgan. Bu 200 ming kishiga sog‘liqni saqlashning asosiy xizmatlarini ko‘rsatish uchun yetarli. 

Ta’kidlanishicha, tibbiy asbob-uskunalar Afg‘onistonning 29 viloyatidagi 40 ta sog‘liqni saqlash muassasalariga topshiriladi. 

JSSTga ko‘ra, samolyot Pokiston tomonidan taqdim etilgan. U Afg‘onistonga tibbiy asbob-uskunalar yetkazib berish rejalashtirilgan uchta reysning birinchisi hisoblanadi.