Жанубий Кореяда ўрмон ёнғинига сабабчи шахс қўлга олинди

Жанубий Кореяда полиция мамлакат жануби-шарқида кенг кўламли ўрмон ёнғинларига сабаб бўлган, ўрмонга ўт қўйишда гумон қилинган 56 ёшли эркакни қўлга олди. Бу ҳақда “Yonhap” хабар берди.

Маълум қилинишича, қўлга олинган шахс 22 март куни соат 11:25 атрофида Шимолий Кёнсан провинцияси Уисон округидаги тепаликда жойлашган оилавий қабрда аждодларни хотирлаш маросимини ўтказаётганда ёнғин содир этганликда айбланмоқда. Шиддатли шамол ва қуруқ об-ҳаво туфайли ёнғин тезда яқин атрофдаги Андон, Чхонсон, Ёнъян ва Йондокка тарқалган, 27 киши ҳалок бўлган.

Ўрмон ёнғинлари 4000 га яқин биноларни, жумладан, UNESCO'нинг Бутунжаҳон мероси рўйхатига киритилган Гоун ибодатхонасини, шунингдек, тураржой бинолари, фабрикалар ва бошқа объектларни вайрон қилган. 20 мингдан ортиқ аҳоли ўз ҳудудларидан кўчиб кетишга мажбур бўлган. Табиий офатга қарши курашга 5 мингга яқин ҳарбий хизматчи ва 146 та вертолёт жалб қилинган.

Полиция маълумотларига кўра, гумонланувчи ўз айбини тан олмаган.

Эслатиб ўтамиз, аввалроқ Жанубий Кореянинг жануби-шарқий минтақасида давом этаётган ўрмон ёнғинларида ҳалок бўлганлар сони 24 кишига етгани ҳақида хабар берилганди.