Жанубий Африкада пингвин вертолёт ҳалокатига сабаб бўлди

Жанубий Африка Республикасида пингвин иштирокида авиаҳалокат содир бўлди. Бу ҳақда “Daily Mail” хабар берди.

Нашрнинг ёзишича, Robinson R44 Raven II туридаги вертолёт Қушлар оролидан Шарқий Кап провинциясига пингвинни олиб кетаётган пайтда ҳалокатга учраган. Ҳодиса олдинроқ содир бўлган бўлса-да, расмий ҳисобот эълон қилингач, тафсилотлар аён бўлган.

Қайд этилишича, тадқиқот ишлари тугагач, олим пингвинни аэропортга етказиб қўйишни сўраган. Қуш оддий картон қутида сақланган ва йўловчи уни тиззасида тутиб турган. Бироқ вертолёт ҳавога кўтарилаётганда, қути сирпаниб кетиб, бошқарув тугмасига урилиб кетган. Шу туфайли вертолётда кучли оғиш юз бериб, парраклар ерга теккан ва ҳалокат содир бўлган.

Ҳодиса оқибатида учувчи ва тадқиқотчи омон қолган, ҳеч ким жароҳат олмаган. Пингвин ҳам соғ қолган. Вертолёт эса жиддий шикастланган.

Жанубий Африка фуқаролик авиацияси бошқармасининг маълум қилишича, парвоз олдидан хавф таҳлили ўтказилган, аммо пингвинни хавфсиз элтиш масаласи етарлича таъминланмаган.

Эслатиб ўтамиз, аввалроқ Японияда тез ёрдам вертолёти денгизга қулаб тушиши оқибатида 3 киши ҳалок бўлган эди. Япония қирғоқ қўриқлаш хизмати маълумотларига кўра, ҳаво кемаси бир кун олдин тушдан кейин диспетчерлар билан алоқани йўқотган. Ўшанда вертолёт Цусима аэропортидан Фукуока префектурасидаги шифохона томон йўл олган бўлган.