Ўзбекистон инқирозга қарши курашиш учун Жаҳон банкидан 1,2 млрд доллар олиши мумкин
Жамият
−
07 Апрель 2020 3741 2 дақиқа
Кеча, 6 апрель куни Бош вазир ўринбосари – Ташқи савдо ва инвестициялар вазири Сардор Умурзоқов ҳамда Европа ва Марказий Осиё минтақаси бўйича Жаҳон банки Гуруҳи вице-президенти Сирил Мюллер видеоконференц алоқа ёрдамида Мамлакатлараро ҳамкорлик платформаси доирасида Ўзбекистон Республикаси ва халқаро молия институтлари, жумладан, Жаҳон банки ўртасидаги ўзаро муносабатлар масалаларини муҳокама қилдилар.
“Томонлар аҳолини коронавирусдан ҳимоя қилишга, корхоналарни, биринчи навбатда, кичик ва ўртача тадбиркорлик субъектларини, қишлоқ хўжалик махсулотлари ишлаб чиқарувчиларини ва хусусий тадбиркорларни қўллаб-қувватлашга қаратилган биргаликдаги истиқболли чораларни муҳокама этишди. Шу қаторда, Ўзбекистондаги ижтимоий-иқтисодий вазиятга коронавирус глобал пандемияси кўрсатган таъсирини юмшатишда Жаҳон банки кўмагининг имкониятлари ва механизмлари келишиб олинди”, дейилади Ташқи савдо ва инвестициялар вазирлиги хабарида.
Сирил Мюллер Жаҳон банки Гуруҳи томонидан шакллантирилган 14 млрд АҚШ доллари миқдоридаги “Тайёрлик ва жавоб стратегик дастури” маблағларини Ўзбекистоннинг инқирозга қарши дастурини қўллаб-қувватлаш учун мобилизация қилиш ниятида эканлигидан хабардор қилди. Аммо маблағларнинг қанча қисми Ўзбекистонга юборилиши ҳозирча аниқ эмас.
Банк раҳбарияти ҳозирги вақтда соғлиқни сақлаш тизимини, ижтимоий ҳимоя институтлари ва муассасаларини ва бюджет кўмагини молиялаштириш учун 1,2 млрд АҚШ доллари миқдорида маблағларни оператив ажратиш масаласи ҳам фаол кўриб чиқилаётганлигини билдирди. Мазкур маблағлар жорий йилнинг март ойида тасдиқланган коммунал инфратузилмани модернизация қилиш лойиҳаларини ва қишлоқ хўжалик маҳсулотлари ишлаб чиқарувчиларини молиялаштириш учун мўлжалланган 700 млн доллар миқдоридаги кредит линияларига қўшимча бўлади.
Видеоконференция якунлари бўйича Сирил Мюллер Ўзбекистонга молиявий кўмак кўрсатиш масаласи устувор тартибда кўриб чиқилишига ишонтирди.
