Зеленскийга Вашингтонда шоу қўйилади ва у яна урушга юборилади – Матвиенко

Россия Федерацияси Федерация Кенгаши спикери Валентина Матвиенконинг айтишича, у Украина билан яқин келажакда музокаралар олиб бориш учун ҳеч қандай шарт кўрмаяпти, чунки Киевда гаплашадиган мавзу ва гаплашадиган одам йўқ. 

“Очиғини айтаман: бугун мен [расмий Киев билан] яқин келажакда бўладиган музокаралар учун зарур шартларни кўрмаяпман. Гапирадиган ҳеч нарса ва ҳеч ким йўқ”, деб жавоб берди Матвиенко журналистлар саволига. 

Матвиенко сўзида давом этаркан, Украинада мустақил сиёсатчилар йўқлиги учун ҳам Киев режими билан гаплашадиган ҳеч нарса мавжуд эмаслигини таъкидлайди. Унга кўра, Киевнинг кун тартиби Вашингтон томонидан белгиланади. 

Матвиенко Украина Президенти Владимир Зеленскийнинг АҚШга ташрифи чоғида тинчлик ўрнатиш шартлари ва Россия билан музокаралар ўтказиш имкониятлари муҳокама қилинмаслигига ишонч билдирди.  

“Зеленскийнинг АҚШга ташрифи, Украинани тинчликка ва музокараларга мажбурлаш учун ҳеч қандай шарт-шароит бўлмаслигига ишончим комил. У ерда янги қурол етказиб бериш муҳокама қилинади, Украинани ҳарбий қўллаб-қувватлаш учун ўсиб бораётган бюджет муҳокама қилинади, бу ҳам музокараларни бошлаш учун шарт-шароит яратмайди. Ўйлайманки, улар шоу қўйишади, кейин елкасидан силаб, яна халта бериб, урушга жўнатишади. Катта эҳтимол билан ташриф фақат шу билан якунланади”, дейди у. 

Матвиенконинг сўзларига кўра, агар Вашингтон Украина томонига шунчаки бармоғини силкитиб, музокара столига ўтиришни айтганида, бу дарҳол амалга оширилган бўларди, буни ҳамма яхши билади.  

“Ҳозирча, афсуски, жамоавий Ғарбнинг мақсадлари Россиянинг ривожланишини иложи борича заифлаштириш, уни ушлаб туриш, ҳарбий кучимизни заифлаштириш ва Россия устидан қандайдир ғалабага эришишга ҳаракат қилишдир, бу мумкин эмас. Бундай нопрофессионаллик, тарихни билмаслик, юртимизни билмаслик, рус характерини, фуқароларимизнинг хусусиятларини билмаслик шунчаки ҳайратланарли”, дейди у. 

Матвиенконинг таъкидлашича, Россия Федерацияси ва Украина ўртасидаги музокаралар фақат расмий Киев бугунги кунда мавжуд воқеликни тан олган тақдирдагина муҳокама қилиниши мумкин.  

“Биз бугун мавжуд воқеликни тан олган ҳолда фақат музокаралар ҳақида гапиришимиз мумкинлигини бир неча бор таъкидлаганмиз. Акс ҳолда, музокараларни бошлаш имкониятини кўрмаяпмиз. Шунинг учун, афсуски, яқин келажакда музокаралар жараёнини бошлаш учун бундай имкониятни кўрмаяпман. Лекин бу бизга боғлиқ эмас, бу қандай сабабларга боғлиқ, мен буни аллақачон айтдим”, дея хулоса қилди Федерация Кенгаши спикери. 

Эслатиб ўтамиз, Украина Президенти Владимир Зеленский бугун, 21 декабрь куни АҚШ Президент Жо Байден билан музокара ўтказгани Вашингтонга йўл олди. Ташриф давомида Зеленский АҚШ Конгрессида нутқ сўзлаши режалаштирилган. Муҳим шуки, бу Зеленский Россия Украинага нисбатан қуролли босқин бошлаганидан бери илк бор хорижий ташрифни амалга оширяпти.