Зеленский Вашингтонда Байден ва Ҳаррис билан учрашди

Украина Президенти Владимир Зеленский кеча, 26 сентябрь куни Оқ уйда АҚШ Президенти Жо Байден билан учрашди. Бу ҳақда СNN хабар берди.

2025 йилнинг январь ойида ваколат муддати тугайдиган Байден Зеленскийга Қўшма Штатлар Украинани қўллаб-қувватлашда давом этишига ишонтирди. Бундан ташқари, у Қўшма Штатлар Киевга янги ҳарбий ёрдам пакетини ажратишини маълум қилди, унинг ҳажми 2,4 миллиард долларни ташкил қилади.

“Очиғини айтсам, Россия урушда ғалаба қозонмайди. Такрорлайман, Россия урушда ғолиб келмайди. Украина ғалаба қозонади ва биз сизнинг ёнингизда туришда давом этамиз”, деди Америка давлат раҳбари.

АҚШ Мудофаа вазирлиги маълумотларига кўра, пакетга қўшимча ҳаво ҳужумига қарши мудофаа тизимлари, ҳаводан ерга ўқ-дорилар, дронлар, хавфсиз алоқа воситалари ва бошқа ҳарбий техника киради. Аввалроқ, Байденнинг президентлик муддати тугагунига қадар Қўшма Штатлар Украинага жами 8 миллиард доллар ажратиши эълон қилинган эди.

Бундан ташқари, Зеленский Вашингтонда АҚШ вице-президенти, ноябрь ойидаги президентлик сайловларида Демократик партиядан номзод Камола Ҳаррис билан учрашди. Ҳаррис ҳам Украина Президентини Вашингтоннинг Киевни қўллаб-қувватлаши доимий тарзда бўлиб қолишига ишонтирди. Бундан ташқари, у Украинани суверен ҳудудининг муҳим қисмидан воз кечишга мажбурламоқчи бўлганларни, Украинадан бетарафликни қабул қилишни талаб қилаётганларни танқид қилди.

“Associated France Press” Ҳарриснинг гапларини сайловдаги рақиби республикачи Дональд Трамп ташаббусларини билвосита танқид қилиш, деб баҳолаган.

Украина бўйича янги йиғилиш Германияда бўлиб ўтади

Оқ уй бир неча кун олдин Жо Байденнинг Германияга ташрифи доирасида октябрь ойида Украина бўйича Рамштейн форматидаги алоқа гуруҳининг навбатдаги йиғилиши бўлиб ўтишини маълум қилганди. Ушбу йиғилишда Украинани Россия тажовузидан мудофаа қилишда қўллаб-қувватлаётган 50 дан ортиқ давлатларнинг саъй-ҳаракатларини мувофиқлаштириш режалаштирилган.

Бундан ташқари, 12 октябрь куни Байден ва Зеленскийнинг Германияда шахсий учрашуви ўтказилиб, у ерда Зеленский тақдим этган “Украинанинг ғалаба режаси” муҳокама қилинади, дея хабар беради Вашингтон.

Эслатиб ўтамиз, аввалроқ АҚШ Президенти Жо Байден Германия канцлери Олаф Шольц, Франция Президенти Эммануэль Макрон ҳамда Буюк Британия Бош вазири Кир Стармер билан Украинага кейинги ёрдамни муҳокама қилиш учун Берлинга ташриф буюриши хабар қилинганди. Норасмий маълумотларга кўра, Байден президентлик курсисини эгаллаганидан бери Берлинга илк бор ташриф буюради. У Германия пойтахтига президентлик сайловларига бир ойдан камроқ вақт қолганда – 10 октябрь куни ташриф билан боради ва у ерда 3 кун қолади. АҚШ, Франция, Германия ҳамда Британия ўртасидаги тўртлик форматидаги учрашув Украинани янада қўллаб-қувватлашга бағишланади.