Zelenskiy Rossiya bilan muzokaralar qachon bo‘lishi mumkinligini aytdi

Ukraina uchun Rossiya Federatsiyasi bilan muzokaralar faqat so‘zsiz o‘t ochishni to‘xtatishga erishilgandan keyingina mumkin bo‘ladi. Bu haqda Ukraina Prezidenti Vladimir Zelenskiy Kiyevda Fransiya Qurolli kuchlari Bosh shtabi boshlig‘i Terri Burkxardt, Buyuk Britaniya Qurolli kuchlari Bosh shtabi boshlig‘i Toni Radakin va Ukraina armiyasining yuqori martabali vakillari bilan uchrashuvi yakunlari bo‘yicha jurnalistlarga ma’lum qildi.

Uchrashuvda o‘t ochishni to‘xtatgan taqdirda Ukraina uchun xavfsizlik kafolatlari, shuningdek, tinchlikparvar sifatida u yerga xorijiy qo‘shinlarni kiritish kabi masalalar muhokama qilindi. Biroq Zelenskiy jurnalistlarga Fransiya va Buyuk Britaniya vakillari bilan muzokaralar chog‘ida muhokama qilingan mavzular tafsilotlarini oshkor qilmasligini aytdi.

“Men ko‘p tafsilotlarni oshkor qila olmayman, chunki bu hali boshlanishi, ammo bu ishning chuqur boshlanishi”, dedi Zelenskiy.

Davlat rahbari bu boradagi ishlar ikki oy avval boshlanganini va butun jarayon yana bir oy davom etishi mumkinligini eslatdi. Ukraina rahbari, shuningdek, faqat uch davlat Ukraina uchun xavfsizlik kafolatlarini yaratish jarayonida ishtirok etmasligini aytdi: 

“Bu koalitsiya bo‘ladi”, deb tushuntirdi davlat rahbari.

Zelenskiyning aytishicha, uchrashuvda tinchlikparvar kuchlar soni va ularning mandati kabi masalalar muhokama qilingan.

“Bu qo‘shinlarga qaysi bosqichda ishonishimiz mumkinligini tushunish men uchun muhim”, dedi Ukraina Prezidenti.

Zelenskiy Krivoy Rog shahriga berilgan raketa zarbalari haqida gapirar ekan, Rossiya “urushni uzaytirishga intilayotganini” ta’kidladi. U Ukraina mojaroga barham berish uchun Moskva bilan muzokaralar olib borishga tayyorligini, biroq Rossiya hujumlarini to‘xtatishi kerakligini qo‘shimcha qildi: 
“Shunchaki gaplashishdan nima foyda? Birinchi navbatda, so‘zsiz o‘t ochishni to‘xtatish kerak. Biz o‘t ochishni to‘xtatish shartsiz bo‘lishi kerak, keyin esa istalgan formatda gaplasha olamiz, deb hisoblaymiz”, dedi Ukraina yetakchisi.

Zelenskiyning qo‘shimcha qilishicha, u AQSHning Rossiyaga nisbatan “bosimini oshirishga” tayyorlanayotgani haqida ma’lumot olgan va qat’iy qadamlarga umid bildirgan.

“Biz aynan shunday hal qiluvchi sanksiyalarni kutmoqdamiz”, dedi Prezident.

Amerika Qo‘shma Shtatlari bilan imzolanishi rejalashtirilgan noyob yer resurslari bo‘yicha kelishuv loyihasi ustidagi hozirgi ishlar haqida gapirar ekan, Zelenskiy bu jarayonda Ukrainaga advokatlik firmasi vakillik qilishini aytdi. Ukraina rahbari ushbu loyihada ishtirok etadigan uchta kompaniyadan birini tanlash jarayoni yaqin kunlarda yakunlanishini qayd etdi.

“Biz bu kelishuvda faqat hamkorlik qadamlarini ko‘ramiz va jamoa bu borada ishlamoqda”, deya qo‘shimcha qildi Zelenskiy.

Davlat rahbari texnik guruh kelishuv loyihasini kelasi hafta ko‘rib chiqish uchun unga taqdim etishini ta’kidladi. 

“Shundan so‘ng Ukraina delegatsiyasi tegishli kelishuvni tuzish uchun AQSHga borishga tayyor bo‘ladi”, deya tushuntirdi Prezident.

Davlat rahbari nutqi yakunida Rossiyaning Kursk viloyatidagi vaziyatga baho berib, Ukraina armiyasi bu hududda qamalda emasligini ta’kidladi.

Shuningdek, u Ukraina Qurolli kuchlari 64 ming rus askarining Kursk viloyatidagi yurishini to‘xtatib qo‘yganini ta’kidladi.

Eslatib o‘tamiz, 3 aprel kuni Zelenskiy Chernigov va Rossiyaning Kursk viloyati bilan chegaradosh Sumi viloyatiga borgandi. Kecha, 4 aprel kuni Rossiyaning  Zelenskiy tug‘ilib o‘sgan shahar – Krivoy Rogga uyushtirgan raketa hujumi oqibatida kamida 18 kishi halok bo‘ldi. Ular orasida to‘qqiz nafar bola ham bor. Shuningdek, hujum oqibatida 50 dan ortiq kishi jarohat olgan.