Зеленскийга суиқасднинг янги тафсилотлари очиқланди

Польшада Украина Президенти Владимир Зеленскийга уюштирилган суиқасднинг янги тафсилотлари очиқланди. Бу ҳақда Украина контрразведкаси ва Хавфсизлик хизмати раиси Васил Малюк “Интерфакс-Украина” ахборот агентлигига берган интервьюсида маълум қилди.

Қайд этилишича, Польша фуқароси, истеъфодаги зобит Павель К. га “Рзешов” аэропортида  Зеленскийни дрон ёки снайпер билан ўлдириш буюрилгани аниқланган.

“Вазифа Президент Зеленскийни “Рзешов” аэропортида жисмонан йўқ қилиш бўлган. Уларда иккита вариант бўлган. Биринчиси FPV дрони, иккинчиси снайпер орқали ўлдириш”, деди СБУ раҳбари.

Маълум қилинишича, суиқасдга қарши операция ўтказишда Польша Ички хавфсизлик агентлиги  Украинага яқиндан ёрдам берган. 

“Польша Ички хавфсизлик агентлигига (ИСА) миннатдорлик билдирмоқчиман. Биз улар билан суиқасдга қарши муҳим операция ўтказдик”, деди Малюк.

Шунингдек, Малюк ўтган йилнинг май ойида Украина контрразведкаси ва Хавфсизлик хизмати  томонидан қўлга олинган Давлат қўриқлаш бошқармасининг икки полковниги ҳақида ҳам муносабат билдирган.

“Аслида уларнинг вазифаси мамлакат амалдорларини ҳимоя қилишдан иборат. Лекин улар ФХХга ишлаб, Президентга қарши суиқасд тайёрлашган. Ўшанда ФХХни генерал-лейтенант Беседа бошқараётганди. Суиқасд муваффақиятсизлигидан кейин Путин уни ишдан бўшатиб, ФХХ тизимида маслаҳатчи қилиб қўйди”, деди у.

Малюкнинг маълум қилишича, ҳозирда Президент Зеленскийдан ташқари, Мудофаа вазирлиги Разведка бош бошқармаси бошлиғи Кирилл Буданов ҳамда Малюкга нисбатан маълумотлар йиғилиб, Россия томонидан суиқасд режалаштирилмоқда. 

Эслатиб ўтамиз, аввалроқ 2024 йил апрель ойида Польшада Владимир Зеленскийга суиқасд уюштиришда гумон қилинган шахс қўлга олингани, у Россия ҳарбий разведкасига маълумот узатишда ва Россия махсус кучларига Зеленскийга эҳтимолий суиқасдни режалаштиришда ёрдам беришда айбланаётгани хабар қилинган эди.

Шунингдек, ўтган йилнинг февралида Украина Президенти Владимир Зеленский Россия билан бошланган можаронинг дастлабки кунларида ўзига уюштирилган суиқасд тафсилотларини очиқлаб, идорасида бир неча киши ҳалок бўлганини маълум қилганди.

Дилшод Ҳакимов