Европанинг собиқ бош дипломати қўлга олинди

Европа дипломатиясининг собиқ раҳбари Федерика Могерини Бельгияда қўлга олинди. Бу ҳақда “Le Soir” хабар берди.

Маълум қилинишича, иш Европа дипломати бўладиган кадрларни тайёрлайдиган Европа коллежидаги ўқув дастурини молиялаштириш билан боғлиқ. Могерини 2020 йилдан бери шу коллежнинг ректори ҳисобланади. 2014–2019 йилларда у Европа Иттифоқининг ташқи сиёсати ва хавфсизлик бўйича олий вакили бўлган.

Тергов “давлат контрактларини тузишда фирибгарлик, порахўрлик, манфаатлар тўқнашуви ва касбий махфийликни бузиш” эҳтимоли билан боғлиқ. Бу ҳолатлар Брюггеда жойлашган, келажак дипломатларини тайёрлайдиган Европа коллежида содир бўлгани тахмин қилинмоқда.

“Le Soir” нашрининг ёзишича, гап тўққиз ойлик ўқув дастурини молиялаштириш жараёнидаги эҳтимолий қонунбузарликлар ҳақида кетмоқда. Нашрнинг маълумотига кўра, Могеринидан ташқари Европа коллежининг раҳбари ва Европа ташқи алоқалар хизмати собиқ бош котиби – италиялик дипломат Стефано Саннино ҳам қўлга олинган.

Коллеж вакилининг айтишича, у Могерини қўлга олинган–олинмаганини билмайди ва қўшимча изоҳ беришдан бош тортган.

Олдинроқ, ОАВ Европа коллежида тинтувлар ўтказилгани ҳақида хабар берганди. Ўшанда уч киши қўлга олингани айтилган, аммо уларнинг исмлари ошкор қилинмаган. Нашрга кўра, текширув дипломатлар тайёрлаш бўйича лойиҳага ажратилган маблағлар доирасидаги тендер билан боғлиқ. Иш талабаларга мўлжалланган, 3,2 миллион еврога сотиб олинган бинога тааллуқли.

Могерини 52 ёшда. У 2014–2019 йилларда Европа Иттифоқининг ташқи сиёсат раҳбари бўлган. Ундан аввал, 2014 йил февраль–октябрь ойларида Италия Ташқи ишлар вазири, шунингдек, 2008–2014 йилларда Италия парламенти қуйи палатаси депутати бўлган.

Могеринига оид терговни Бельгия ва Европа прокуратураси олиб бормоқда. Европа прокуратураси – 2021 йилда ташкил этилган мустақил орган бўлиб, ЕИ маблағлари билан боғлиқ фирибгарлик, порахўрлик, пул ювиш каби жиноятлар билан шуғулланади.