Европаликлар АҚШга сафарларини бекор қила бошлади

Европа давлатларидан келган сайёҳлар Оқ уй раҳбари Дональд Трамп давридаги сиёсий ва иқтисодий кескинликлар ҳамда чегарадаги адоватдан хавотирлар фонида АҚШга сафарларини бекор қила бошлади. Бу ҳақда “Financial Times” хабар берди.

north_east

Трамп ақлий қобилият тестидан ўтди

Халқаро савдо маъмурияти (ITA, АҚШ Савдо вазирлиги тизимидаги агентлик) маълумотларига кўра, жорий йилнинг март ойида АҚШда камида бир кеча-кундуз қолган ғарбий европалик саёҳатчилар сони ўтган йилнинг шу даврига нисбатан 17 фоизга камайди. Ирландия, Норвегия ва Германия каби мамлакатлардан саёҳатлар 20 фоиздан кўпроққа камайди.

“Politico”нинг ёзишича, Канада сайёҳлик агентликлари ҳам кескин пасайишни қайд этмоқда. Ванкуверда жойлашган Travel Group компанияси буюртмалар 90 фоизга камайганини ва Оттавада жойлашган Travac Tours июль ойигача АҚШдаги барча турларни бекор қилганини хабар қилди. “Tourism Economics” таҳлилчилари бу йил Канададан саёҳатлар 20 фоизга камайиб, Қўшма Штатларга 3,4 миллиард доллар йўқотилган даромад келтиришини кутмоқда.

ITA маълумотларига кўра, март ойида Қўшма Штатларга ташриф буюрган халқаро сайёҳларнинг умумий сони 12 фоизга камайди. Бу коронавирус пандемияси сабабли чекловлар жорий этилган 2021 йилнинг март ойидан бери энг кескин пасайишдир.

Ушбу тенденция мамлакат ялпи ички маҳсулотининг 2,5 фоизини ташкил этувчи АҚШ туризм саноатига таҳдид солмоқда. Айрим авиакомпаниялар ва меҳмонхона тармоқлари трансатлантик саёҳатларга талаб камайиши ҳақида огоҳлантирмоқда.

“Атиги икки ой ичида Трамп АҚШ обрўсини йўққа чиқарди, бунга ЕИдан саёҳатлар қисқарганини мисол қилиш мумкин. Бу нафақат АҚШ иқтисодига яна бир даҳшатли зарба, балки қайта тикланиши учун авлодлар керак бўлиши мумкин бўлган обрўга зарар етказилди”, деди “Kayak” сайёҳлик сайтининг асосчиси Пол Инглиш.

Шу билан бирга, Америка штатлари ва шаҳарларининг расмийлари федерал ҳукумат сиёсатига қўшилмаслигини кўрсатишга ҳаракат қилмоқда.

“Менимча, умуман олганда, Канада ва Европадан келган одамлар Нью-Йорк бутун дунёдан келган одамларни кутиб оладиган меҳмондўст жой эканини билади”, деди New York City Hospitality Alliance ижрочи директори Эндрю Риги.

Оқ уй матбуот котибининг айтишича, Трампнинг “Американи яна бой, хавфсиз ва гўзал қилиш” режалари ҳам америкаликлар, ҳам халқаро саёҳатчилар учун фойдали бўлади.

Эслатиб ўтамиз, аввалроқ “The Washington Post” собиқ ва амалдаги федерал амалдорларга таяниб, АҚШ Президенти Дональд Трамп маъмурияти президентлигининг биринчи йилида 1 миллионгача муҳожирни депортация қилмоқчилиги ҳақида ёзганди.