ЕИ ҳам Ўзбекистон компанияларини “қора рўйхат”га киритмоқчи

Бугун, 14 май куни Европа Иттифоқи Россияга кўмаклашгани учун Ўзбекистон компанияларига ҳам тегишли бўлган 17-янги санкциялар пакети бўйича келишиб олди.  Бу ҳақда “Financial Times” хабар берди.

Маълум қилинишича, ушбу чора-тадбирлар Украинадаги ҳарбий ҳаракатлар сабаб жорий қилинмоқда. Санкцияларнинг расмий варианти жорий йилнинг 20 май куни, Евроиттифоқ Ташқи ишлар кенгашида қабул қилиниши кутилмоқда.

Янги санкциялар Россиянинг “соя флоти” деб аталувчи 149 та нефть танкерига, шунингдек, Россияни санкцияларни четлаб ўтишда қўллаб-қувватлаганликда гумон қилинаётган учинчи давлатлар компанияларига қарши қаратилган. Улар орасида БАА, Туркия, Сербия, Ветнам ва Ўзбекистон компаниялари ҳам бор. Аммо санкцияларга киритилган компаниялар номи ошкор этилмаган.

“Bloomberg”нинг ёзишича, ЕИ Россиянинг энергетика секторига қарши чораларда ЛУКОЙЛнинг Дубайдаги савдо бўлими — Litasco Middle East DMCC компаниясини “қора рўйхат”га киритишни кўриб чиққан. Бироқ бунга Венгрия қарши чиққани сабабли бу таклиф киритилмаган.

“Handelsblatt” нашрининг хабар беришича, санкциялар пакетига жиддий ва баҳсли таклифлар қўшилмаган — чунки Венгрия ёки Словакия томонидан рад этилиши мумкин эди. Маълумки, ЕИ санкцияларини жорий қилиш учун барча 27 аъзо давлатнинг якдил розилиги зарур.

Евроиттифоқ дипломатияси раҳбари Кая Калласнинг айтишича, бу пакет қабул қилингач, навбатдаги санкциялар раунди устида иш бошланади. Франция Ташқи ишлар вазири Жан-Ноэль Барро эса ЕИ ва АҚШ Россияга қарши чораларни мувофиқлаштириб боришни истаётганини билдирган.

Россия расмийлари эса бу санкцияларни ноқонуний деб ҳисобламоқда.

Эслатиб ўтамиз, аввалроқ Украина Президенти Владимир Зеленский Ўзбекистон, Эрон ва Хитой компанияларига қарши санкциялар киритган эди.

Ўзбекистондаги қуйидаги корхоналар “қора рўйхат”га тушган:

1. “Фарғона кимё заводи” МЧЖ (Фарғона)
2. “Raw materials cellulose” МЧЖ (Жиззах)
3. “Mercury Renaissance” МЧЖ ҚК (Тошкент)