Саида Мирзиёева Андижонда зудлик билан эътибор қаратилиши талаб этилаётган объектларга борди

Бугун, 24 июнь куни Ўзбекистон Президенти Администрацияси раҳбари Саида Мирзиёева Андижон вилоятида зудлик билан эътибор қаратилиб, янгиланиши талаб этилаётган бир нечта объектга борди. Бу ҳақда Саида Мирзиёева ўзининг Telegram-каналида маълум қилди.

“Олтинкўл туманидаги “Кўмакай” оилавий поликлиникасини кўздан кечирдик. Ушбу бинодан 1988 йилдан буён фойдаланиб келинмоқда, у бугунги кун стандартларидан анча орқада қолган”, дейди Ўзбекистон Президенти Администрацияси раҳбари. 

Шунингдек, Саида Мирзиёева вилоятдаги 9-сонли боғча ва 36-сонли мактабда ҳам бўлган. Боғча 1970 йилларда қурилган оромгоҳ ўрнида жойлашган. Мактаб биноси ундан ҳам эски – 1960 йилда барпо этилган бўлиб, сиғими ўқувчилар сонига мос келмайди. Ҳар икки объект янгидан қурилади.

“Гап тиббиёт ва таълим ҳақида кетар экан, шифокор ва ўқитувчининг иш жойи, яратилган шароит, фарзандини мактаб ёки боғчага кузатаётган ота-онанинг кўнгли тўқ бўлиши – энг муҳим, биринчи галдаги масаладир. Одамлар турмушини яхшилашга қаратилган ўзгаришлар ўн йиллаб чўзилмаслиги керак. Жараённи тезлаштириш, аниқ ва сезиларли натижа тез фурсатда амалда кўриниши лозим”, дейди Саида Мирзиёева.

Эслатиб ўтамиз, аввалроқ Саида Мирзиёева Бухородаги нураб ётган боғча ва поликлиникаларни кўздан кечирган эди.