Янги таклифлар ҳозир Трампнинг столида – Зеленский

Кеча, 23 апрель куни Буюк Британия пойтахти Лондонда Украина, Европа мамлакатлари ва АҚШ вакиллари ўртасида урушни тугатишга оид янги таклифлар тақдим этилди. Бу ҳақда Украина Президенти Владимир Зеленскийга таяниб, РБК Украина хабар берди.

“Лондонда учрашув бўлиб ўтди. У ерда улар таклиф қилган тегишли стратегия мавжуд эди. Бизнинг жамоамиз, Европа вакиллари ва АҚШ делегацияси конструктив равишда гаплашди ва ҳужжатда тегишли пунктлар пайдо бўлди”, деди Украина раҳбари Жанубий Африка Республикаси Президенти Сирил Рамапоса билан ўтказган матбуот анжуманида.

Зеленский, шунингдек, тинчлик битимида Украина Конституциясига қарши бўлган бандлар бўлмаслиги кераклигини такрорлади. Унга кўра, таклифлар аллақачон АҚШ Президенти Дональд Трампга тақдим этилган.

“Ҳозирда бу ҳужжат Трампнинг столида, деб ҳисоблайман”, деди Украина Президенти.

РБК Украина манбаларига кўра, бу Франция, Буюк Британия, Германия ва Украина ўртасидаги “умумий қарашлар”га асосланган таклифлар бўлиб, улар АҚШнинг махсус вакили Кит Келлогг томонидан Вашингтонга етказилиши зарур бўлган.

Маълумот учун, кеча, 23 апрель куни Лондонда Украина, Буюк Британия, Франция, Германия ва АҚШ вакиллари ўртасида экспертлар даражасида музокаралар ўтказилди. 

Эслатиб ўтамиз, дастлаб мазкур учрашувга Ташқи ишлар вазирликларининг раҳбарлари таклиф қилинган эди. Аммо АҚШ Давлат котиби Марко Рубио кутилмаганда Буюк Британияга ташриф буюришни рад этди ва Франция ҳамда Германия вакиллари ҳам унга эргашди.