Вучич намойишлар фонида сайлов ўтказилишини маълум қилди

Кеча, 28 декабрь куни намойишчиларнинг талабини бажариш учун Сербия Президенти Александр Вучич Миллий Ассамблеяга (бир палатали парламент) навбатдан ташқари сайловлар 2026 йилда ўтказилишини маълум қилди. Президент баёноти маҳаллий матбуотда ёритилди.

Парламент биноси олдида ўз тарафдорлари қаршисида нутқ сўзлаган давлат раҳбари расмийлар намойишчиларга ён бераётганини тан олди. 

“Яқин келажакда, келаси йили биз сайлов участкаларига борамиз”, деди Вучич, бироқ аниқ санани маълум қилмади.

Шу билан бирга, Президент ҳукмрон коалиция навбатдан ташқари сайловларда ҳал қилувчи ғалабага эришишига ишонч билдирди. У яқинда беш муниципалитетда бўлиб ўтган сайловларда ҳокимият ғалаба қозонганини эслатди. Амалдаги парламентнинг ваколат муддати эса 2027 йил декабрь ойида якунланади.

Вучич, шунингдек, Белграддаги Миллий Ассамблея олдида намойишчилар томонидан ташкил этилган чодирлар шаҳарчаси 3–4 январгача демонтаж қилиниб, унинг ўрнида Янги йил байрам тадбирлари ўтказилишини маълум қилди. У юзага келган норозиликларни “рангли инқилоб” деб атаб, унинг муваффақиятсизликка учраганини таъкидлади.

28 декабрь куни Сербияда намойишчилар муддатидан олдин парламент сайловларини қўллаб-қувватлаш мақсадида бутун мамлакат бўйлаб кенг кўламли имзо йиғиш кампаниясини бошлади. Ташкилотчилар маълумотига кўра, имзолар 113 та ҳудудда тўпланган.

Хабарларга кўра, Сербия Президенти декабрь ойи ўрталарида ҳам муддатидан олдин сайловлар масаласига тўхталиб, “2026 йил охири” ҳақида гапирган.

Маълумот ўрнида, 2024 йил 1 ноябрь куни Нови Сад шаҳридаги яқинда таъмирдан чиқарилган темирйўл вокзалининг ташқи бетон қопламаси қулаб тушиб, 6 ёшдан 74 ёшгача бўлган 16 киши ҳалок бўлган эди. Ушбу фожиадан сўнг қурилиш вазири лавозимида ишлаган Горан Весич истеъфога чиқди. Кейинчалик у ва вокзални реконструкция қилишда иштирок этган яна 12 киши ҳибсга олинди.

Мазкур ҳодисадан кейин Сербияда 1996 йилдан буён энг йирик норозилик намойишлари тўлқини бошланди. Намойишчилар Нови Сад фожиасини коррупция, бепарволик, қурилиш хавфсизлиги қоидаларига риоя этилмаслиги ҳамда ҳукумат тепасидаги қариндош-уруғчилик билан боғламоқда.

Жорий йил январь ойида Сербия Бош вазири ва Нови Саднинг собиқ мэри Милош Вучевич норозилик намойишлари фонида истеъфога чиқди. Мамлакат парламенти март ойида ушбу қарорни тасдиқлади. Президент Александр Вучич томонидан номзод сифатида кўрсатилган тиббиёт профессори Журо Мацут янги ҳукумат раҳбари этиб тайинланди.

Кейинчалик у “демократик мамлакатлар ҳар сафар норозилик намойишлари кучайганида сайлов тақвимини ўзгартира олмайди, чунки бу фуқароларнинг ўзига зарар етказади”, дея баёнот берган эди.

Эслатиб ўтамиз, аввалроқ Украинада сайлов ўтказиш учун пул йўқлиги ҳақида хабар берилганди.