Венгрия Россия газини Словакияга етказиб беради
Олам
−
23 Январь 2101
Россия ёқилғисининг Украина орқали транзити тўхтатилганидан кейин Венгрия Словакияга газ етказиб беради. Бу ҳақда Венгрия Ташқи ишлар вазири Петер Сийярто маълум қилди.
Унга кўра, етказиб беришни таъминлаш учун Венгрия Турк оқими қувури ва унинг Болгария ва Сербиядаги шохобчалари орқали етказиб бериладиган газдан фойдаланиши мумкин.
“Биз Словакияни энергия билан таъминлаш учун транзит имкониятларидан тўлиқ фойдаланишга тайёрмиз”, деди жаноб Сийярто Будапештдаги матбуот анжуманида.
У Венгрия 2024 йилда Турк оқими орқали 7,6 миллиард куб метр газ олганини эслатди. Шу билан бирга, қувур қуввати 8,5 миллиард куб метрни ташкил этади. Шундай қилиб, вазирнинг таъкидлашича, Словакия фойдаланиши мумкин тахминан 900 миллион куб метр захира мавжуд.
Эслатиб ўтамиз, 2025 йилнинг 1 январь кунидан эътиборан “Газпром” Украина орқали газ етказиб беришни тўхтатди. Компания 2019 йил 30 декабрда “Газпром” ва Украинанинг “Нафтогаз” компанияси ўртасида Россия газини ташишни ташкил этиш бўйича имзоланган шартнома ва икки мамлакат GТS операторлари ўртасидаги ўзаро ҳамкорлик тўғрисидаги шартноманинг амал қилиш муддати тугаганини эслатди. Украина Энергетика вазирлигига кўра, Россия газининг Украина орқали транзити “миллий хавфсизлик манфаатлари учун” тўхтатилган. “Reuters” хабарига кўра, Украина транзитини тўхтатиш Молдовага энг оғир таъсир қилади. Словакия, Чехия ва Австрия каби Россия газининг бошқа харидорлари муқобил етказиб бериш йўлларини ўрнатган. Венгрия Россия газини Турк оқими газ қувури орқали олишда давом этади.
Словакия Бош вазири Роберт Фицо Россия газининг Украина орқали транзитини тўхтатишни Владимир Зеленский томонидан уюштирилган “саботаж” деб атаганди ва украиналик қочқинларга ёрдамни камайтириш билан таҳдид қилганди. Ушбу таҳдидга Киевнинг “Газпром” билан Россия газини Украина орқали етказиб бериш бўйича келишувни узайтирмагани сабаб қилиб кўрсатилганди.
