Венгрия парламенти фақат аёл ва эркак жинсини тан олди (видео)

Кеча, 14 апрель куни Венгрия парламенти мамлакат конституциясига “инсон ё эркак, ё аёл” бўлиши ҳақида ўзгартиришни киритишни ёқлаб овоз берди. Бу ҳақда “Index” хабар берди.

“Венгрия никоҳ институтини эркак ва аёл ўртасидаги ихтиёрий иттифоқ сифатида, шунингдек, оилани миллат мавжудлигининг асоси сифатида ҳимоя қилади. Оила никоҳга, ота-оналар ва болалар ўртасидаги муносабатларга асосланади. Инсон ё эркак, ё аёл. Ота - эркак, она - аёл”, дейилади хабарда.

Қайд этилишича, тегишли тузатишларни 140 нафар парламент аъзоси қўллаб-қувватлаган. 21 нафар депутат уларга қарши фикр билдирган. Шу тариқа конституцияни ўзгартириш учун зарур бўлган овозларнинг учдан икки қисми тўпланган. Бундан ташқари, тегишли ўзгаришларни Венгрия Бош вазири Виктор Орбан қўллаб-қувватлаган.

Хабарга кўра, Венгрия парламенти биноси олдида тузатишлар бўйича овоз бериш чоғида мухолифатнинг кўплаб тарафдорлари норозилик билдирган.

14 апрелда Венгрия Конституциясига киритилган тузатишлардан бирига кўра, болаларнинг руҳий ва маънавий ривожланишини ҳимоя қилиш яшаш ҳуқуқидан ташқари барча асосий ҳуқуқлардан устун бўлган асосий ҳуқуқ мақомини олади.

Эслатиб ўтамиз, аввалроқ АҚШ Президенти Дональд Трамп мамлакатда ва бутун дунёда “соғлом фикр инқилоби”ни эълон қилиб, АҚШда фақат иккита жинс – эркак ва аёл тан олинишини айтганди.