Венесуэладаги зилзила қурбонлари сони 2000 га яқинлашди

Ўтган ҳафта Венесуэлада магнитудаси 7,2 ва 7,5 бўлган икки кучли зилзила оқибатида ҳалок бўлганлар сони 1943 нафарга етди. Бу ҳақда ББС хабар қилди.

Маълум қилишича, мамлакатда ўн минглаб одамлар озиқ-овқат ва вақтинчалик бошпанага муҳтож. 10 мингдан ортиқ киши жароҳат олган, яна минглаб одамлар бедарак деб ҳисобланмоқда. NASA сунъий йўлдош маълумотларига асосланган дастлабки баҳолашга кўра, табиий офат натижасида тахминан 58 870 та бино зарарланган ёки бутунлай вайрон бўлган.

Қайд этилишича, Ла-Гуайра зилзиладан энг кўп жабр кўрган ҳудудлардан бири бўлиб, маҳаллий аҳоли қутқарув ишларини ўз кучи билан давом эттиришга ҳаракат қилмоқда. БМТнинг Қочқинлар бўйича олий комиссари бошқармаси (UNHCR) маълумотига кўра, ҳудудда озиқ-овқат тақчиллиги кенг тарқалган, асосий коммунал хизматлар ишдан чиққан ва алоқа тизимлари деярли узилган.

“Ёрдамдан фойдаланиш чеклангани сабабли жамоалар ўртасидаги кескинлик кучаймоқда”, дейилади ташкилот баёнотида.

Ла-Гуайрада яшовчи 18 ёшли сотувчи Даниэла Армас AFP агентлигига баъзи ёрдамлар тарқатилаётганини, аммо озиқ-овқат учун одамлар ўртасида қаттиқ тортишувлар юзага келаётганини айтган. UNHCR келгуси олти ой давомида зилзиладан жабрланган 30 минг нафар аҳолини ҳимоя қилиш, биринчи навбатдаги ёрдам воситалари ва вақтинчалик бошпана билан таъминлаш учун дастлабки босқичда 15 миллион доллар зарурлигини билдирган.

Жаҳон соғлиқни сақлаш ташкилоти (JSST) эса мамлакат соғлиқни сақлаш тизими “ўта кучли босим” остида ишлаётганини маълум қилган. Ташкилот вакили Кристиан Линдмайернинг сўзларига кўра, эмлаш даражаси пастлиги туфайли қизамиқ ва дифтерия каби вакцина орқали олди олинадиган касалликлар тарқалиши хавфи ҳам ошиб бормоқда.

Эслатиб ўтамиз, аввалроқ Венесуэлада содир бўлган икки кучли зилзила оқибатида ҳалок бўлганлар сони қарийб 1500 нафарга етгани хабар қилинган эди.