Венесуэладаги зилзила қурбонлари 3 мингга яқинлашди

Венесуэлада жорий йил 25 июнга ўтар кечаси содир бўлган иккита зилзила қурбонлари сони деярли 3000 кишига етди. Бу ҳақда кеча, 4 июль куни мамлакат парламенти спикери Хорхе Родригес баёнот берди.

Унга кўра, фалокат оқибатида камида 2954 киши ҳалок бўлган, яна камида 16 592 нафар аҳоли жароҳатланган. Зилзилалардан ўн кун ўтиб, халқаро қутқарув гуруҳлари вайроналар орасидаги қидирув амалиётларини аста-секин якунламоқда, ваҳоланки, ўн минглаб одамлар ҳанузгача бедарак йўқолган деб ҳисобланмоқда. AFP’нинг ёзишича, бу каби табиий офатлар пайтида вайроналар остидан одамларни қутқариб қолиш учун энг муҳим вақт, қоида тариқасида, 72 соатни ташкил этади.

Гувоҳларнинг журналистларга сўзлаб беришича, зилзиладан кейинги дастлабки соатларда кўпчилик қутқарув гуруҳлари етиб келгунига қадар яқинларини қидириб, вайроналарни ўз кучлари билан вайрон қилиб, тозалашларига тўғри келган.

Эслатиб ўтамиз, жорий йилнинг 24 июнь куни Венесуэла шимолида, мамлакат пойтахти Каракасдан ғарбда, бор-йўғи 39 сониялик фарқ билан магнитудаси 7,2 ва 7,5 га тенг бўлган иккита зилзила юз берганди. Бу мамлакатда сўнгги 125 йил ичида кузатилган энг кучли ер силкинишлари ҳисобланади. Улардан кейин ўнлаб афтершоклар юз берди ва уларнинг оқибатида кўплаб уйлар вайрон бўлди.