Venesuela tinchimayapti: poytaxtda yana zilzila sodir bo‘ldi

Bugun, 11 iyul kuni Venesuela poytaxti Karakasda 3 magnitudali yana bir zilzila qayd etildi. Shuningdek, joriy yilning 24 iyun kuni ketma-ket sodir bo‘lgan kuchli zilzilalar oqibatida halok bo‘lganlar soni 4 mingdan oshdi. Bu haqda “The Guardian” xabar berdi.

Ma’lum qilinishicha, 24 iyun kuni sodir bo‘lgan tabiiy ofat oqibatida 4 118 kishi halok bo‘lgan, 16 ming 740 nafari jarohat olgan. Minglab fuqarolar esa hanuzgacha bedarak yo‘qolgan deb hisoblanmoqda. Bu so‘nggi yuz yildan ortiq vaqt ichida Venesuelada kuzatilgan eng kuchli zilzila bo‘lib, qirg‘oqbo‘yidagi La-Guayra shtatida butun boshli turar joy mavzelari vayron bo‘lgan.

Rasmiylar tirik qolganlarni qidirish ishlarini yakunlaganini bildirgan. Biroq yaqinlaridan darak topa olmagan fuqarolar xarobalar orasida ularni izlashda davom etmoqda.

Shuningdek, 11 iyul kuni poytaxt Karakasda 3 magnitudali yana bir zilzila qayd etilib, binolardagi odamlar xavfsizlik maqsadida evakuatsiya qilingan.

Qayd etilishicha, Birlashgan Millatlar Tashkiloti Venesueladagi gumanitar vaziyatni yengillashtirish uchun 1,3 million kishiga yordam ko‘rsatish maqsadida qariyb 300 million AQSH dollari ajratishga chaqirgan. Tashkilot hisob-kitobiga ko‘ra, uy-joy va infratuzilmaga yetgan zarar 37 milliard AQSH dollariga baholanmoqda.

Venesuela muvaqqat prezidenti Delsi Rodriges esa tiklanish ishlarini moliyalashtirish uchun xorijda muzlatilgan davlat aktivlarini qaytarishni ta’kidlamoqda. U Buyuk Britaniya sanksiyalari tufayli muzlatilgan qariyb 30 tonna Venesuela oltinini mamlakatga qaytarish bo‘yicha Qirol Charlz III’ga murojaat qilganini ma’lum qilgan.

Eslatib o‘tamiz, avvalroq Venesueladagi zilzilalar oqibatida halok bo‘lganlar soni 3 535 nafarga yetgani haqida xabar berilgan edi.

Shuningdek, Xalqaro futbol federatsiyasi (FIFA) jamg‘armasi Venesueladagi zilzila oqibatida jabrlanganlarga 1 million dollar miqdorida xayriya ajratishini ma’lum qilgandi.