Вашингтонда Исроил элчихонасининг икки ходими отиб ўлдирилди

Кеча, 21 май куни кечқурун Вашингтондаги яҳудий музейи олдида Исроил элчихонасининг икки ходими отиб ўлдирилди. Полиция гумондорнинг қўлга олинганини айтди. Бу Чикаголик 30 ёшли Элиас Родригес бўлиб чиқди. Бу ҳақда CBS News хабар берди.

У музей олдида қадам ташлаб, кейин ичкарига кириб, тўрт кишидан иборат гуруҳга яқинлашди ва улардан иккитасини отиб ташлади.

Отишма содир этган шахс хавфсизлик ходимлари томонидан қўлга олинган. У ҳибсга олинганида: "Фаластинга озодлик!" деб ҳайқирган.

Исроил элчихонаси матбуот котибининг айтишича, икки ходимга яҳудий музейида бўлиб ўтган тадбирда ўқ узган. Марҳумлар эркак ва аёл, ёш эр-хотин бўлган.

АҚШ Президенти Дональд Трамп Truth Social интернет-платформаси орқали қурбонлар оилаларига ҳамдардлик билдирди ва воқеани антисемитизм билан изоҳлади.

АҚШ расмийлари воқеа юзасидан тергов олиб бормоқда. АҚШ ички хавфсизлик вазири Кристи Ноэм Исроил элчихонасининг икки ходими ҳалок бўлганини тасдиқлади.

“Биз воқеани фаол равишда тергов қилмоқдамиз ва қўшимча маълумот олишга ҳаракат қилмоқдамиз”, деб ёзди у Х ижтимоий платформасида.

Исроилнинг БМТдаги доимий вакили Денни Данон воқеани “антисемит терроризмнинг жирканч ҳаракати” деб атади. Данон АҚШ расмийлари айбдорларни қаттиқ жазолашига ишонч билдирди ва Исроил бутун дунё бўйлаб ўз фуқаролари ва вакилларини қатъий ҳимоя қилишда давом этишига ваъда берди.