Ўзбекистоннинг ЖЧдаги ўйини Қозоғистонда рекорд ўрнатди

2026 йилги Жаҳон чемпионати гуруҳ босқичидаги Португалия ва Ўзбекистон терма жамоалари ўртасидаги баҳс Қозоғистонда турнирнинг энг юқори рейтинг қайд этган телетранслацияси бўлди. Бу ҳақда “Qazsport” хабар берди.

“Qazsport” телеканали орқали жонли эфирда намойиш этилган Португалия – Ўзбекистон учрашуви турнир доирасидаги барча трансляциялар орасида энг юқори рейтингни қайд этган.

“К Research Central Asia” маълумотларига кўра, учрашувни телевидение ва рақамли платформалар орқали қарийб 2 миллион нафар томошабин кузатган. Трансляциянинг телевизион рейтинги 4,76 фоиз, томошабинлар улуши эса 45,1 фоизни ташкил этган.

Жаҳон чемпионатининг энг кўп томоша қилинган бешта учрашуви қуйидагича:

• Португалия – Ўзбекистон: рейтинг 4,76%, улуш 45,1% (1 680 161 нафар томошабин);
• Португалия – Конго Демократик Республикаси: рейтинг 3,61%, улуш 37,8%;
• Аргентина – Австрия: рейтинг 3,42%, улуш 33,5%;
• Испания – Кабо-Верде: рейтинг 2,88%, улуш 24,1%;
• Германия – Кюрасао: рейтинг 2,86%, улуш 32,5%.

Эслатиб ўтамиз, Португалия ва Ўзбекистон ўртасидаги баҳс португалияликларнинг 5:0 ҳисобидаги йирик ғалабаси билан якунланган. Учрашувда Криштиану Роналду дубль муаллифи бўлганди.