Ўзбекистоннинг Россия билан ҳамкорлиги фаол ривожланаётгани эълон қилинди

Россия ва Ўзбекистон ўртасидаги ҳамкорлик мавжуд хавф ва таҳдидларга қарамай, турли соҳаларда фаол ривожланишда давом этмоқда. Бу ҳақда Федерация Кенгашининг Конституциявий қонунчилик ва давлат қурилиши қўмитаси раисининг биринчи ўринбосари Ирина Рукавишникова Федерация Кенгашининг Ўзбекистон Олий Мажлиси (парламент қуйи палатаси) ва Сенати (юқори палатаси) билан ҳамкорлиги бўйича комиссия йиғилишида маълум қилди. 

“Россия Федерацияси ва Ўзбекистон Республикаси ўртасидаги икки томонлама минтақалараро ҳамкорлик нафақат компаниялар ва ташкилотлар даражасида, балки фуқаролар ўртасида ҳам самарали ҳамкорликни таъминламоқда, Россия-Ўзбекистон ҳамкорлиги янги таҳдидларга муносиб тарзда бардош бериб, турли йўналишларда фаол ривожланишда давом этмоқда”, дейди сенатор комиссия йиғилишида. 

Унинг сўзларига кўра, айни пайтда икки давлат вакиллари иқтисодий ва сармоявий алоқаларни кенгайтириш бўйича кенг қамровли ишларни амалга оширмоқда. Рукавишникова Россия ва Ўзбекистон ўртасидаги товар айирбошлаш 2023 йилда 2022 йилга нисбатан 10 фоиздан кўпроқ ошгани, Россия экспортининг ўсиши қарийб 7 фоизни, импорти эса 18 фоизга яқинни ташкил этгани ҳақида маълум қилди.  

“Бу йил ҳам ижобий динамика кутилмоқда”, дейди у. 

Парламент аъзоси, шунингдек, саноат ва тадбиркорлик соҳасидаги лойиҳаларни амалга ошириш жараёнида Россия ва Ўзбекистон ўртасидаги ўзаро ҳамкорлик мустаҳкамланганини билдирган. Рукавишникова қайд этганидек, тематик форумлар ва кўргазмалар бундай ҳамкорликнинг самарали воситасига айланган. Бундан ташқари, минтақалараро ҳамкорликнинг тўпланган ҳуқуқий-меъёрий базаси ҳам муҳим механизм ҳисобланади. 

ННТ қўллаб-қувватлаш

Шунингдек, мажлисда парламент аъзолари жамоат ва диний ташкилотлар ўртасидаги ҳамкорликни мустаҳкамлаш истиқболларини муҳокама қилган. Рукавишникова бундай ташкилотларни қўллаб-қувватлашнинг қонунчилик механизмлари ҳақида гапириб, бу бир неча йўналишда амалга оширилаётганини урғулаган. 

“Улар орасида ижтимоий йўналтирилган нодавлат нотижорат ташкилотлари, болалар ва ўсмирлар жамоат ташкилотларига молиявий, мулкий ва консультатив ёрдам кўрсатишни алоҳида айтишимиз мумкин. Шунингдек, давлат ва диний ташкилотлар билан ишлайдиган давлат сектори мутахассислари малакасини ошириш, ижтимоий йўналтирилган ННТ ходимлари учун таълим дастурларини ўз ичига олган кадрлар бўйича кўмаклашиш чоралари кўрилмоқда”, дейди сенатор. 

Қолаверса, Рукавишникова ахборот маконида нотижорат ташкилотларни ҳимоя қилишга алоҳида эътибор қаратди. Бундай ташкилотлар ўз фаолияти тўғрисидаги маълумотларни жойлаштириш учун давлат органларининг хавфсиз рақамли платформаларидан фойдаланиши мумкин.  

“Бу имконият нотижорат ташкилотларга ўз платформаларини сақлаш харажатларини камайтириш имконини беради, шунингдек, киберҳужумларга қарши ишончли тўсиқни таъминлайди”, дейди Федерация Кенгашининг Қонунчилик бўйича қўмитаси раисининг биринчи ўринбосари. 

Парламент аъзосининг сўзларига кўра, ҳозирда нотижорат ташкилотлари фаолияти учун тўлақонли қонунчилик инфратузилмаси яратилган. Шу билан бирга, Рукавишникова бундай ташкилотларнинг ижтимоий фойдали салоҳиятини янада очиб бериш бўйича фаол ишларни давом эттириш зарурлигини билдирган.

“Икки томонлама парламент ҳамкорлигимиз икки давлатнинг миллий қонунчилик базасини бойитиш, давлат органлари ва нотижорат ташкилотлари ўртасидаги ўзаро ҳамкорликнинг янги форматларини ишлаб чиқиш имконини беришига ишончим комил”, дейди у.