Ўзбекистоннинг олтин-валюта захиралари қарийб 600 млн долларга кўпайди

Ўзбекистоннинг халқаро захиралари жорий йилнинг июль ойида 590 млн долларга ошди. 1 август ҳолатига мамлакатнинг расмий захира активлари 64,35 млрд долларни ташкил этган. Бу ҳақда Марказий банк ҳисоботида келтирилган.

Марказий банк маълумотларига кўра, жорий йилнинг 1 июль ҳолатида Ўзбекистоннинг расмий захира активлари 63,76 млрд доллар бўлган. Бир ой давомида ушбу кўрсаткич 589,8 млн долларга ошган.

Захираларнинг валюта қисми июль ойида 208,8 млн долларга кўпайиб, 7,65 млрд долларга етган. Шундан қимматли қоғозлар портфели 2,86 млрд доллардан 1,76 млрд долларга камайган. Нақд валюта ва депозитлар ҳажми эса 4,58 млрд доллардан 5,89 млрд долларга ошган.

Олтин захирасининг қиймати ҳам 365,2 млн долларга ошиб, 56,12 млрд долларни ташкил этган. Бироқ олтиннинг соф физик ҳажми 13,9 млн трой унциядан 13,8 млн трой унцияга камайган.

Қайд этиш жоиз, июль ойида захиралар ҳажмининг ошишига жаҳон бозорида олтин нархининг кўтарилиши ҳам таъсир қилган. Хусусан, ой давомида олтин нархининг 4016,70 доллардан 4052,20 долларгача ошиши захиралар қийматининг 490 млн долларга кўпайишига сабаб бўлган.

Шунингдек, Ўзбекистоннинг расмий захира активларидан ташқари хорижий валютадаги бошқа активлари ҳам июль ойида 102,6 млн доллардан 196,3 млн долларгача ошган.

Эслатиб ўтамиз, жорий йилнинг март ойида Ўзбекистоннинг олтин-валюта захиралари қиймати 8,1 млрд долларга камайган эди.