Ўзбекистоннинг мундиалдаги имконияти баҳоланди

2026 йилги Жаҳон чемпионати йўлланмасини қўлга киритган ва қатнашиш эҳтимоли юқори бўлган энг кучли терма жамоаларнинг мундиалдаги имкониятлари баҳоланди. ESPN нашри 87 та терма жамоанинг Жаҳон чемпионатидаги имкониятларини таҳлил қилиб чиқди.

Баҳолашда жамоаларнинг сўнгги ўйинлардаги натижалари ҳамда таркибдаги футболчиларнинг бозор қиймати асосий мезон сифатида олинди.

Рейтинг натижаларига кўра, Дидье Дешам бошчилигидаги Франция терма жамоаси биринчи ўринни эгаллади. Ушбу жамоанинг навбатдаги Жаҳон чемпионатидаги ҳужум учлиги Килиан Мбаппе, Майкл Олисе ва Усмон Дембеледан иборат бўлиши кутилмоқда. “Transfermarkt” маълумотларига кўра, бу учликнинг ўртача бозор қиймати 127 миллион еврони ташкил этади. 2018 йилда Жаҳон чемпиони бўлган ва 2022 йилги финалда пенальтилар сериясида мағлубиятга учраган Франция энди 2026 йилги турнирга янада кучли ва истеъдодли таркиб билан тайёрланмоқда.

Иккинчи поғонани Европа чемпиони Испания, кучли учликни эса Европа қитъасидан биринчилардан бўлиб Жаҳон чемпионатига йўлланма олган Англия терма жамоаси якунлади. Мусобақанинг амалдаги чемпиони Аргентина эса рўйхатда 7-ўринни эгаллаган.

Фабио Каннаваро бошчилигидаги Ўзбекистон терма жамоаси ESPN рейтингида 53-ўриндан жой олди. Осиё қитъасидаги жамоалар орасида Япония 25-ўринда қайд этилган бўлиб, у минтақада энг юқори натижани қайд этди. Шунингдек, Жанубий Корея (42), Австралия (45) ва Эрон (48) ҳам Ўзбекистондан юқори ўринларни банд этган.

Эслатиб ўтамиз, аввалроқ Ўзбекистон миллий терма жамоаси Жаҳон чемпионатига қура ташлаш маросимида 3-саватчадан жой олиши ҳақида хабар берилган эди.